ҲАДАФ-ҲИФЗИ ПАРАНДАГОН ВА ҲАЙВОНОТ. Дар Тоҷикистон корҳои биотехникӣ гузаронида мешаванд
ДУШАНБЕ, 22.01.2026 /АМИТ «Ховар»/. Бо мақсади пешгирӣ намудани талафоти олами ҳайвонот ва парандагон аз сардиҳои зимистон аз ҷониби Агентии хоҷагии ҷангали назди Ҳукумати Ҷумҳурии Тоҷикистон дар ҷумҳурӣ корҳои биотехникӣ идома доранд. Дар ин хусус АМИТ «Ховар» бо истинод ба ин агентӣ хабар медиҳад.
Аз ҷумла, дар Муассисаи давлатии хоҷагии ҷангали ноҳияи Айнӣ ба хотири таъмин намудани ғизои ҳайвонот ва парандагон дар мавзеъҳои махсуси ҳайвонгузар ва ҷойҳои сукунати парандагон ҷав, гандум, кунҷора, намак ва хошок пошида шуд.
Бо ин мақсад дар Муассисаи давлатии хоҷагии ҷангали ноҳияи Файзобод низ корҳои биотехникӣ гузаронида шуданд.
Дар ҷараёни ин чорабиниҳо барои таъмин намудани ғизои ҳайвонот ва парандагон дар мавзеъҳои махсуси ҳайвонгузар ва ҷойҳои сукунати парандагон, дар маҷмуъ зиёда аз 200 килограмм гандум, 50 килограмм олучаи хушк, 100 килограмм себи хушк ва 300 килограмм хошок пошида шуд.
Дар ин раванд танзими саршумор ва таркиби намуди ҷонвароне, ки дар чунин шароит зиндагӣ менамоянд, амалӣ гардида, то охири сардиҳои замистон барои ба шароити табиӣ мутобиқ кунонидану сермаҳсулгардонии ҳайвоноти ваҳшӣ корҳои биотехникӣ гузаронида мешаванд.
Бояд тазаккур дод, ки баробари фаро расидани фасли сармо ва барфпӯш гардидани кӯҳҳо ҳайвонҳо ва парандаҳои нодир дар дарёфти ғизо танқисӣ мекашанд. Гуруснагии онҳо метавонад сабаби ба ҳалокат расиданашон гардад. Барои роҳ надодан ба талафоти ҳайвоноту парандагон кормандони Агентии хоҷагии ҷангали назди Ҳукумати Ҷумҳурии Тоҷикистон ҳамасола тадбирҳои мушаххас меандешанд.
Ёдовар мешавем, ки олами гуногунии биологии Тоҷикистон хеле ғанӣ ва нотакрор мебошад. Дар Тоҷикистон беш аз 13 ҳазор намуди ҳайвонот муайян гардида, бештари онҳо дар экосистемаҳои кӯҳӣ сукунат менамоянд. Дар мавзеъҳои водию пешкӯҳҳо, дарёҳо, заминҳои кишоварзии назди шаҳру ноҳияҳои ҷумҳурӣ намудҳое паҳн гардидаанд, ки бо аҳолӣ зич ҳаёт мебаранд. Аз мониторинги солҳои охир бармеояд, ки дар зери таъсири омилҳои гуногуни антропогенӣ баъзе намудҳои олами ҳайвонот миқдоран кам шуда, ҳатто як қисми намудҳо зери хатари маҳвшавӣ қарор доранд.
Зарангези ЛАТИФ,
АМИТ «Ховар»
АКС: Агентии хоҷагии ҷангали назди Ҳукумати Ҷумҳурии Тоҷикистон
«ТОҶИКОНА МЕПӮШЕМ!». Дар Донишгоҳи давлатии Бохтар иқдоми ҷумҳуриявӣ доир шуд
ПУРСИДЕД, ҶАВОБ МЕДИҲЕМ. Кадом қонуншиканиҳо метавонанд боиси ихроҷи муҳоҷирони тоҷик аз Русия гарданд?
ДАР ПАЙРАВӢ БА ИҚДОМҲОИ ПЕШВОИ МИЛЛАТ. Дар ноҳияи Рашт ба 80 оилаи ниёзманд ангишт кумак карда шуд
Дар ноҳияи Файзобод китобхона, кӯдакистон ва синфхонаҳои иловагӣ ба истифода дода шуданд
Нақшаи буҷети суғуртаи иҷтимоӣ ва нафақа дар вилояти Суғд беш аз 100 фоиз иҷро гардид
ИМРӮЗ–РӮЗИ ИТТИФОҚҲОИ КАСАБА. Беш аз 15 ҳазор аъзои иттифоқи касаба ба солимгардонӣ фаро гирифта шуданд
Бахшида ба Рӯзи байналмилалии бабри барфӣ дар Хоруғ конфронси илмӣ-амалӣ доир шуд
ПУРСИДЕД, ҶАВОБ МЕДИҲЕМ. Доғи судӣ чӣ гуна метавонад монеаи гирифтани патент дар Федератсияи Русия гардад?
Оид ба идоракунии инноватсионии давлатӣ дар шароити трансформатсияи иқтисоди рақамӣ дар Тоҷикистон ҳамоиш доир шуд
Дар Самарқанд Саммити ҷаҳонӣ доир ба некӯаҳволии кӯдакон баргузор гардид
Байни Тоҷикистон ва Узбекистон Ёддошти тафоҳуми ҳамкорӣ ба имзо расид
Дар вилояти Суғд зиёда аз 1200 муассисаи тиббии давлатӣ ва хусусӣ фаъолият дорад
