Дар Донишгоҳи давлатии ҳуқуқ, бизнес ва сиёсати Тоҷикистон оид ба шарҳи Паёми Президенти Тоҷикистон ба Маҷлиси Олӣ ҳамоиш доир шуд

ДУШАНБЕ, 27.01.2026 /АМИТ «Ховар»/. 27 январ дар Донишгоҳи  давлатии ҳуқуқ, бизнес ва сиёсати Тоҷикистон дар ҳамбастагӣ бо Иттифоқи касабаи кормандони маориф ва илми вилояти Суғд таҳти унвони «Паёми Пешвои миллат-оинаи дастоварду комёбиҳо ва пешрафти ҷомеа» конференсияи илмию амалӣ баргузор гардид. Дар ин хусус ба АМИТ «Ховар» аз ин донишгоҳ иттилоъ доданд.

Ректори Донишгоҳи давлатии ҳуқуқ, бизнес ва сиёсати Тоҷикистон Шероз Муминзода иброз дошт, ки «Паёми Президенти Тоҷикистон ба Маҷлиси Олии Ҷумҳурии Тоҷикистон ҳамасола ҳамчун санади муҳими сиёсӣ, иҷтимоӣ ва иқтисодӣ, барномаи мукаммали рушди давлат ва ҷомеа, инчунин роҳнамои асосии сиёсати дохилию хориҷии мамлакат муаррифӣ мегардад. Ин ҳуҷҷати тақдирсоз на танҳо натиҷагирии марҳилаи муайяни рушди давлат, балки нақшаи возеҳу воқеии ояндаи устувори давлатдорӣ мебошад. Дар ин ҳуҷҷати муҳим тамоми самтҳои калидии ҳаёти ҷомеа- аз иқтисоди миллӣ, саноатикунонӣ ва рушди соҳибкорӣ то маорифу илм, сиёсати иҷтимоӣ, тандурустӣ, фарҳанг, ҳуқуқу қонунмандӣ ва таҳкими амнияти миллӣ мавриди таҳлили амиқу ҳамаҷониба қарор гирифтанд».

Иброз гардид, ки Пешвои миллат бо диди стратегии хос зарурати гузариш ба иқтисоди рақобатпазир, рушди технологияҳои муосир, рақамикунонии ҳама соҳаҳо, баланд бардоштани сатҳи некуаҳволии аҳолӣ, фароҳам овардани ҷойи нави кор ва таҳкими пояҳои ҳуқуқии давлатдориро таъкид менамоянд.

Яке аз самтҳои асосии Паёми Президенти Тоҷикистон ба Маҷлиси Олӣ таваҷҷуҳи махсус ба илм ва маориф мебошад. Сарвари давлат борҳо таъкид намудаанд, ки бе рушди илм, таҳқиқоти бунёдӣ ва амалӣ, инчунин бе тайёр намудани мутахассисони баландихтисосу ҷавобгӯ ба талаботи замон ноил шудан ба рушди устувор ғайриимкон аст. Ин нукта аҳамияти махсус дошта, барои муассисаҳои таҳсилоти олӣ, аз ҷумла Донишгоҳи давлатии ҳуқуқ, бизнес ва сиёсати Тоҷикистон масъулияти ҷиддӣ ва таърихӣ маҳсуб мешавад.

«Донишгоҳи давлатии ҳуқуқ, бизнес ва сиёсати Тоҷикистон ҳамчун маркази муҳими илмию таҳқиқотӣ вазифадор аст, ки сиёсати илмиро мутобиқ ба дастуру ҳидоятҳои Паёми Президенти Тоҷикистон ба Маҷлиси Олӣ пайваста такмил диҳад, таҳқиқоти илмиро дар самтҳои ҳуқуқ, иқтисод, сиёсати давлатӣ, идоракунии муосир ва тиҷорат ба роҳ монда, натиҷаҳои онро дар амалия татбиқ намояд. Ҳамзамон тарбияи донишҷӯён дар руҳияи ватандӯстӣ, худшиносии миллӣ, масъулияти шаҳрвандӣ ва эҳтироми қонун яке аз самтҳои афзалиятноки фаъолияти таълимӣ ва тарбиявии донишгоҳ  боқӣ мемонад»,- иброз намуд Шероз Муминзода.

Гуфта шуд, ки ин санади муҳим қутбнамоест, ки ҳар фарди ватандӯсту худогоҳро барои саҳмгузорӣ дар ҷашни пуршукуҳи 35-солагии Истиқлоли давлатии Ҷумҳурии Тоҷикистон водор месозад. Аз ин рӯ, мо бояд сарҷамъона фаъолият намуда, барои истиқболи сазовори ин ҷашни бузурги миллӣ заминаи мустаҳкам фароҳам оварем.

АКС: Донишгоҳи давлатии ҳуқуқ, бизнес ва сиёсати Тоҷикистон