Дар Маркази минтақавии бехатарӣ, амният ва кафолати химиявӣ, биологӣ, радиатсионӣ ва ядроӣ давраи омузишӣ баргузор шуд

ДУШАНБЕ, 17.01.2026 /АМИТ «Ховар»/. Аз 12 то 16 январ дар Маркази минтақавии бехатарӣ, амният ва кафолати химиявӣ, биологӣ, радиатсионӣ ва ядроии Агентии амнияти химиявӣ, биологӣ, радиатсионӣ ва ядроии АМИТ давраи омӯзишӣ вобаста ба камераҳои муосири мушоҳидавӣ барои кормандони Қӯшунҳои сарҳадии Кумитаи давлатии амнияти миллии Ҷумҳурии Тоҷикистон баргузор гардид. Дар ин хусус ба АМИТ «Ховар» аз Агентии амнияти химиявӣ, биологӣ, радиатсионӣ ва ядроӣ хабар доданд.

Ҳадаф аз баргузории давраи омӯзишӣ баланд бардоштани иқтидор ва такмили малакаю маҳорати кормандони саҳроии Қӯшунҳои сарҳадӣ марбут ба назорати доимӣ дар сарҳад, мубориза бо терроризм, қочоқи маводи мухаддир, маводҳои химявӣ, биологӣ, радиатсионӣ ва ядроӣ мебошад.

Дар ҷараёни дарсҳои амалӣ дар озмоишгоҳҳои инноватсионии илмӣ-таҳқиқотии химия, биология ва самти амният, ки аз ҷониби мутахассисони соҳибтаҷриба баргузор шуд, дар хусуси истифодаи технологяи муосир дар сарҳад, таҳкими амнияти миллӣ ва баланд бардоштани сатҳи касбияти марзбонон маълумоти муҳим пешниҳод гардид.

Бояд тазаккур дод, ки Маркази минтақавии бехатарӣ, амният ва кафолати химиявӣ, биологӣ, радиатсионӣ ва ядроии Академияи миллии илмҳои Тоҷикистон, ки 29 октябри соли 2024 аз ҷониби Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ мавриди истифода қарор гирифта, имрӯзҳои фаъолияти назаррас дорад.

Дар ин марказ, ки дорои 16 озмоишгоҳи инноватсионии илмӣ-таҳқиқотии самтҳои химия, биология ва нодиртарин озмоишгоҳҳои илмии соҳаи иммунологӣ, вирусологӣ, бехатарӣ ва амнияти биологӣ ва криминалистикаи ядроӣ мебошад, барои омӯзиш ва ташхиси маводи химиявӣ, биологӣ, радиатсионӣ ва ядроӣ хизмат менамояд.

Озмоишгоҳҳо бо таҷҳизот ва технологияи наву замонавӣ муҷаҳҳаз буда, барои гузаронидани таҳқиқот, ташхис ва таҳлил дар асоси стандартҳои байналмилалӣ омода шуда, қадами муҳиме баҳри таҳкими амният ва иқтидори илмӣ на танҳо дар Ҷумҳурии Тоҷикистон, балки дар тамоми минтақаи Осиёи Марказӣ гузошта мешавад.

АКС: Агентии амнияти химиявӣ, биологӣ, радиатсионӣ ва ядроии Академияи миллии илмҳои Тоҷикистон