Хушкмеваҳои Тоҷикистон дар «Gulfood Dubai» ба намоиш гузошта шуданд

ДУШАНБЕ, 28.01.2026 /АМИТ «Ховар»/. Ҳафт ширкат ва корхонаҳои коркарди хушкмеваҳо аз Тоҷикистон- «Водии меваҳо»,  «Оро Исфара», «Исфара Фуд», «Баракат Исфара», «Зардолуи Исфара», «Висол Исфара», «Алӣ Априкот» ва Корхонаи воҳиди давлатии  «Тоҷагропромэкспорт» дар намоишгоҳи «Gulfood Dubai» иштирок доранд.  Ин намоишгоҳ аз 26 то 30 январи соли 2026 дар шаҳри Дубайи Амороти Муттаҳидаи Араб баргузор мегардад.

АМИТ «Ховар» бо истинод ба Маркази тиҷорати байналмилалӣ иттилоъ медиҳад, ки корхонаҳои коркарди хушкмеваҳои Тоҷикистон дар намоишгоҳи «Gulfood»  дар баробари 8500 корхона аз 195 кишвари дунё дар гӯшаи махсуси Тоҷикистон маҳсулоти тозатаринро манзури ҳазорон бинандагон аз саросари дунё намудаанд.

Намоишгоҳи «Gulfood Dubai» ҳар сол баргузор шуда, яке аз намоишгоҳҳои бузургтарини тиҷоратӣ дар саноати хӯрокворӣ мебошад. Ин намоишгоҳ иштироккунандагон, коршиносони пешсафи соҳа ва харидоронро аз саросари ҷаҳон барои табодули идеяҳо, тавсеаи равобити тиҷоратӣ ва барқарор намудани ҳамкории стратегӣ ҷамъ меорад.

Намоишгоҳ барои корхонаҳои коркарди хушкмеваи Тоҷикистон имкони хуб фароҳам меорад, то маҳсулот ва имконияташонро муаррифӣ ва тарғиб намоянд, ҳамкории эҳтимолии тиҷоратиро баррасӣ карда, бо раванд ва тамоюлоти нави бозор дар минтақа шинос шаванд.

Менеҷери пешбурди содироти Ассотсиатсияи байналмилалии истеҳсолкунандагон ва содиркунандагони маҳсулоти кишоварзии Тоҷикистон Толиб Абдулаҳатов мегӯяд, ки “бо намоиши маҳсулоти аълосифати гуногун дар ин намоишгоҳ ширкатҳои Тоҷикистон азм доранд, ки аз байни дистрибюторҳо ва харидорон шарикони эҳтимолии байналмилалиро ҷалб карда, ҳамкории тиҷоратиро ба нафъи мамлакат рушд диҳанд. Бо ҳадафи пешбурд ва тарғиби лаззати беназири хушкмеваҳои Тоҷикистон гӯшаи мамлакат мизбони меҳмонони сершуморе хоҳад буд, ки барои чашидани таъми табиӣ ва нодири маҳсулоти мо меоянд”.

Роҳбари корхонаи «Висол Исфара» Камол Идрисов бар он назар аст, ки “иштирок дар ин намоишгоҳ имкони хубе аст, ки мо бо харидорони бештар робитаи мустақим барқарор намуда, ҷуғрофиёи бозори худро васеътар созем, бренди ширкатҳои худро дар бозорҳои беруна муаррифӣ намоем, бо тамоюлҳои нав дар бозор, талабот ва интизориҳои бозор шинос шавем ва аз навгониҳо огоҳ гардем”.

Дар ин намоишгоҳ ширкатҳои Тоҷикистон ҳамчунин дар вохӯриҳою ҳамоишҳои тиҷоратӣ иштирок карда, бо баррасиҳои босамар доир ба равандҳои нави соҳа маълумот мегиранд. Онҳо доир ба талаботи бозор ва муштариён маълумоти муфид дарёфт мекунанд, ки ин барои рақобатпазирӣ дар бозор ва ҷустуҷӯи самтҳои нави рушд ёрӣ мерасонад.

АКС аз манбаъҳои боз