НИШАСТИ МАТБУОТӢ. Соли 2025 аз Тоҷикистон ба 64 давлати ҷаҳон молу маҳсулот содирот гардид
ДУШАНБЕ, 30.01.2026 /АМИТ «Ховар»/. Соли 2025 аз Тоҷикистон ба 64 давлати хориҷаи дуру наздик молу маҳсулоти ватанӣ содирот шуда, Нидерланд, Швейтсария, Чин, Узбекистон ва Туркия дар панҷгонаи аввал қарор доранд. Дар ин хусус имрӯз директори Агентии содироти назди Ҳукумати Ҷумҳурии Тоҷикистон Баҳриддин Сироҷиддинзода зимни нишасти матбуотӣ ба хабарнигорон иттилоъ дод.
Баҳриддин Сироҷиддинзода тазаккур дод, ки дар ин давра ҳам номгӯи маҳсулоти ватанӣ ва ҳам давлатҳое, ки ба онҳо молу маҳсулот содирот карда мешавад, тамоюли рӯ ба афзоиш дорад.
Содироти молу маҳсулот соли 2025 бе назардошти металлҳои қиматнок 2149,6 миллион долларро ташкил дод, ки нисбат ба соли 2024 549,4 миллион доллар зиёд мебошад. Аз ҳаҷми умумии содирот 96,8 фоизро маҳсулоти саноатӣ ва 3,2 фоизро маҳсулоти кишоварзӣ ташкил додааст. Содироти маҳсулоти саноатӣ 2408,6 миллион долларро ташкил дод, ки 517,9 миллион доллар нисбат ба соли 2024 афзоиш ёфтааст.
Соли 2025 аз ҷумҳурӣ дар ҳаҷми 190,5 ҳазор тонна маҳсулоти кишоварзӣ ба маблағи 79,2 миллион доллар содирот шудааст, ки нисбат ба соли 2024 22,5 миллион доллар зиёд мебошад. Маҳсулоти кишоварзӣ асосан аз ҳисоби меваи хушк 46,5 миллион доллар, меваҷот 20,7 миллион доллар, сабзавот 5,2 миллион доллар ва дигар намуди маҳсулоти кишоварзӣ 6,8 миллион доллар содирот шудааст.
Содироти меваи хушк дар давраи ҳисоботӣ 46,5 миллион долларро ташкил дод, ки ин нишондиҳанда нисбат ба соли 2024 ба маблағи 14,8 миллион доллар зиёд мебошад.
Содироти меваҳо, аз ҷумла ангур, зардолу, писта, олуболу ва гелос, олу, шафтолу, лимӯ, хурмо, чормағз, себ ва ғайра дар ин давра ба 20,7 миллион доллар баробар гардид, ки нисбат ба соли 2024 ба маблағи 7,6 миллион доллар зиёд аст.
Директори Агентии содирот вобаста ба соҳаи пахтакорӣ маълумот пешниҳод намуда, иброз дошт, ки ҷудо намудани маблағгузории имтиёзнок барои ҳавасмандгардонии соҳаи пахтакорӣ ва коркарди саноатии пахта, ки рушди устувори ин соҳаҳо зери таваҷҷуҳи доимии Президенти мамлакат қарор дорад, тадбирҳои зарурӣ андешида истодааст. Аз ҷумла, ҳамкории зичи Агентии содирот бо Корпоратсияи байналмилии исломӣ оид ба маблағгузории тиҷоратии Бонки исломии рушд (ITFC) ба роҳ монда шуда, дар айни замон барои ҷудо намудани маблағҳои зарурӣ барои ҳавасмандгардонии соҳаи пахтакорӣ корҳо пеш бурда мешаванд.
«Аз ҷониби Корхонаи воҳиди давлатии «Тоҷагропромэкспорт»-и Агентии содирот бо ҷалби маблағгузории ширкатҳои хориҷӣ ва бе ҷалби маблағҳои давлатӣ ба Ҷумҳурии Исломии Эрон дар маҷмуъ 19 ҳазору 808 тонна нахи пахтаи ватанӣ ба маблағи умумии 28 миллиону 805 ҳазор доллар содирот гардид»,-гуфт Баҳриддин Сироҷиддинзода.
Раъно НУСРАТУЛЛО,
АМИТ «Ховар»
АКС: АМИТ «Ховар»
Муовини Сарвазири Тоҷикистон бо нашъунамои чигити зери плёнка дар ҶДММ «Син-Силу»-и ноҳияи Ёвон шинос шуд
Душанбе моҳи август мизбони «Food industry Forum of Tajikistan-2026» мегардад
Намояндагони Тоҷикистон дар Форуми умумиҷаҳонии шаҳрҳо дар Боку иштирок намуданд
Ҳаҷми умумии ҳамлу нақл байни Тоҷикистон ва Қазоқистон 5,8 фоиз афзудааст
ТАВАҶҶУҲ! Интиқоли одии маблағ байни аъзои оила, дӯстон, наздикон ва дигар шаҳрвандон тавассути ҳамёнҳои электронӣ андозбандӣ намегардад!
Дар ҶДММ «Саноати Ашт» хатҳои нави истеҳсолӣ васлу насб гардиданд
СОЛИ БАЙНАЛМИЛАЛИИ ЗАНОНИ ХОҶАГИДОР. Дар Тоҷикистон беш аз 52 ҳазор хоҷагии деҳқониро занон роҳбарӣ менамоянд
Кишоварзони ноҳияи Кӯшониён дар беш аз 10 ҳазор гектар пунбадона кишт намудаанд
Мулоқоти роҳбарони Комиссияи байниҳукуматӣ оид ба ҳамкории иқтисодӣ байни Тоҷикистон ва Русия баргузор шуд
Тоҷикистон ва Миср дар соҳаи авиатсияи гражданӣ Ёддошти тафоҳуми ҳамкорӣ ба имзо расониданд
Иштирокдорони Конфронси Созмони озуқаворӣ ва кишоварзӣ бо низоми кишоварзии нодири дараи Алмосӣ — гӯсфанди зоти ҳисорӣ ва ангури тоифӣ шинос шуданд
Дар Душанбе Намоишгоҳи байналмилалии молҳо ва хизматрасонӣ барои саломатӣ ва зебоӣ доир мешавад
