НИШАСТИ МАТБУОТӢ. Соли 2026 филмҳои миллӣ дар платформаи нави синамоии «tojikfilm.tv» намоиш дода мешаванд
ДУШАНБЕ, 30.01.2026 /АМИТ «Ховар»/. Соли 2026 дар арафаи Ҷашни байналмилалии Наврӯз нахустин маротиба платформаи миллии синамоии «tojikfilm.tv» мавриди истифодаи шаҳрвандон қарор дода мешавад. Дар ин платформа барои ҳаводорони синамои ватанӣ филмҳои дар давраи собиқ шуравӣ истеҳсолшуда, инчунин филмҳое, ки солҳои Истиқлолияти давлатӣ таҳия гардидаанд, ба намоиш гузошта мешаванд. Дар ин хусус директори Муассисаи давлатии «Тоҷикфилм» Маҳмадсаид Шоҳиён 30 январ зимни нишасти матбуотӣ ба хабарнигорон иттилоъ дод.
Гуфта шуд, ки филмсозон ва ширкатҳои истеҳсолкунанда метавонанд бо риояи қонунгузории Ҷумҳурии Тоҷикистон филмҳояшонро барои намоиш дар ин платформа пешниҳод намоянд.
Дар посух ба суоли хабарнигори АМИТ «Ховар» вобаста ба нархгузории платформа ва ҷавобгӯ будани он ба стандартҳои муосири рақамӣ ва талаботи тамошобинон директори «Тоҷикфилм» иброз гардид, ки дар мувофиқа бо Агентии зиддиинҳисории назди Ҳукумати Ҷумҳурии Тоҷикистон арзиши истифодаи платформа дар як моҳ 10 сомонӣ пешбинӣ шудааст. Бо ин маблағ дӯстдорони синамои тоҷик метавонанд ҳамаи филмҳои миллиро тамошо намоянд.
Директори Муассисаи давлатии «Тоҷикфилм» гуфт, ки ҳадафи асосии таъсиси платформа, пеш аз ҳама, на даромад, балки дастраси шаҳрвандон намудани филмҳои миллӣ мебошад. Дар ин замина иброз гардид, ки филмҳои классикӣ, муосир ва ҳуҷҷатие, ки дар солҳои собиқ Иттиҳоди Шуравӣ наворбардорӣ шудаанд, барои тамошобинон ройгон пешниҳод мегарданд.
Таъкид шуд, ки таъсиси платформаи «tojikfilm.tv» ба муаррифии синамои тоҷик дар ҷомеа нигаронида шуда, нусхабардорӣ ва паҳн намудани филмҳои дар платформа ҷойгиршуда тибқи қонунгузории Ҷумҳурии Тоҷикистон манъ мебошад.
Маҳмадсаид Шоҳиён изҳор дошт, ки платформаи миллии синамоии «tojikfilm.tv» бо назардошти стандартҳои байналмилалии рақамӣ таҳия шуда, сифати баланди намоиши филмҳоро таъмин менамояд. Тавассути ин платформа сокинони кишварҳои гуногуни ҷаҳон метавонанд ба осонӣ ба филмҳои истеҳсоли Тоҷикистон дастрасӣ пайдо намуда, филмҳои миллиро бо сифати баланд тамошо кунанд.
Моҳинави НАВРӮЗ,
АМИТ «Ховар»
АКС: АМИТ «Ховар»
Вазирони корҳои дохилии ИДМ аз Осорхонаи миллии Тоҷикистон боздид намуданд
Ҳайати Донишкадаи давлатии фарҳанг ва санъати Тоҷикистон дар Фестивали байналмилалии донишҷӯёни ИДМ иштирок намуд
ҲАМДИЛӢ АЗ ҲАМЗАБОНӢ БЕҲТАР АСТ. Эҳдо ба Рӯзи бузургдошти Мавлоно Ҷалолиддини Балхӣ
Дар Осорхонаи миллии Тоҷикистон оид ба дастовардҳои Истиқлоли давлатӣ ҳамоиш доир гардид
Моҳи октябр дар Душанбе Бозиҳои XX Делфии ҷавонони кишварҳои аъзои ИДМ доир мегардад
Дар Душанбе Рӯзҳои кинои Эрон баргузор мегарданд
Дар Рим Намоишгоҳи байналмилалии «Тоҷикистон – кишвари ёдгориҳои нодир» ташкил карда мешавад
Ба ифтихори дохил гардидани Резервати биосферии Ромит ба Шабакаи ҷаҳонии мамнуъгоҳҳои биосферии ЮНЕСКО конфронс доир шуд
Дар Осорхонаи миллии Тоҷикистон маҳфили «Шоҳномахонӣ» баргузор гардид
«ТОҶИ СОМОН». Марҳилаи интихоби беҳтарин филмҳо барои синамоҷоизаи миллӣ оғоз гардид
Котиби генералии Ассамблеяи парламентии Осиё дар Осорхонаи миллӣ бо таъриху тамаддуни тоҷикон шинос шуд
Китоби академик Фарҳод Раҳимӣ «Тамаддуни ориёӣ ва рисолати таърихии миллати тоҷик» нашр шуд
