Ҳоким Холиқзода бо муовини Президенти Агентии ҳамкории байналмилалии Ҷопон мулоқот намуд

ДУШАНБЕ, 27.01.2026 /АМИТ «Ховар»/. Имрӯз муовини якуми Сарвазири Ҷумҳурии Тоҷикистон Ҳоким Холиқзода бо муовини Президенти Агентии ҳамкории байналмилалии Ҷопон (JICA) Ёшифуми Ёшикава мулоқот намуд, хабар медиҳад АМИТ «Ховар».

Зимни мулоқот дурнамои ҳамкории дуҷониба дар бахшҳои афзалиятноки иқтисодию иҷтимоӣ баррасӣ гардид. Ҷонибҳо аз сатҳи кунунии муносибатҳо изҳори қаноатмандӣ карда, идомаи муколамаи созандаро муҳим арзёбӣ намуданд.

Таъкид гардид, ки Ҷопон тавассути JICA дар рушди иҷтимоию иқтисодии Тоҷикистон саҳми назаррас дорад.  «Айни замон лоиҳаҳои муштарак дар соҳаҳои нақлиёт, инфрасохтор, энергетика, таъминоти об, маориф ва тандурустӣ амалӣ карда мешаванд», — гуфта шуд дар мулоқот.

Ҳамзамон саҳми JICA дар омода намудани мутахассисони баландихтисос, рушди соҳибкории хурду миёна ва таҳкими зерсохтори нақлиётӣ муҳим арзёбӣ гардид.

Дар мулоқот таваҷҷуҳи хосса ба ҷалби сармоягузории мустақими Ҷопон ба иқтисоди Тоҷикистон равона карда шуд.  Тавсеаи ҳамкорӣ дар бахшҳои энергетикаи «сабз», саноат, нақлиёт, кишоварзӣ, маориф ва рушди сармояи инсонӣ аз афзалиятҳои асосӣ арзёбӣ гардид.

Ҷонибҳо инчунин масъалаҳои ҳамкорӣ дар соҳаи инноватсия ва технологияҳои рақамӣ, аз ҷумла таъсиси Маркази минтақавии зеҳни сунъӣ дар Душанбе ва таъсиси Маркази муштараки инноватсионӣ байни Тоҷикистон ва Ҷопонро баррасӣ намуданд.

Дар фарҷом омодагии тарафҳо барои идомаи ҳамкории амалӣ ва густариши минбаъдаи шарикӣ таъкид гардид.

АКС: АМИТ «Ховар»