Омӯзгорони муассисаҳои таълими шаҳру ноҳияҳои вилояти Суғд бо низоми имтиҳонҳои марказонидаи дохилшавӣ шинос мешаванд

ДУШАНБЕ, 30.01.2026 /АМИТ «Ховар»/. Маркази миллии тестии назди Президенти Ҷумҳурии Тоҷикистон дар 18 шаҳру ноҳияҳои вилояти Суғд машғулияти шиносоиро бо низоми имтиҳонҳои марказонидаи дохилшавӣ барои омӯзгорони муассисаҳои таълимӣ оғоз намуд.

Тавре ба АМИТ «Ховар» аз Маркази миллии тестӣ хабар доданд,  ҳадаф аз баргузории даври дуюми машғулият омода намудани омӯзгорони муассисаҳои таълимии таҳсилоти умумии асосӣ, миёнаи умумӣ, ибтидоӣ ва миёнаи касбӣ ҷиҳати гузаронидани даври сеюми машғулият барои хатмкунандагон дар муассисаҳои таълимии мазкур мебошад.

Татбиқи амалии низоми имтиҳонҳои марказонидаи дохилшавӣ ба муассисаҳои таълимии таҳсилоти миёна ва олии касбии Ҷумҳурии Тоҷикистон дар рушди соҳаи маориф, баланд бардоштани сатҳи касбияти донишҷӯён ва мутахассисон, инчунин арзёбии воқеии дониши хатмкунандагони муассисаҳои таълимӣ нақши муҳим дорад.

Бояд таъкид намуд, ки дуруст ба роҳ мондани корҳои омодагӣ ба имтиҳонҳои марказонидаи дохилшавӣ, бахусус чорабиниҳои иттилоотию таблиғотӣ, яке аз омилҳои асосии муваффақияти довталабон дар ин имтиҳонҳо маҳсуб меёбад.

АКС: Маркази миллии тестии назди Президенти Ҷумҳурии Тоҷикистон