Паёми Президенти Тоҷикистон — роҳнамои рушди ҷумҳурӣ дар шароити мураккаби ҷаҳони муосир

ДУШАНБЕ, 30.01.2026 /АМИТ «Ховар»/. Дар Академияи идоракунии давлатии назди Президенти Ҷумҳурии Тоҷикистон дар мавзуи «Паёми Президенти Ҷумҳурии Тоҷикистон — роҳнамои рушди ҷумҳурӣ дар шароити мураккаби ҷаҳони муосир» машварати илмӣ-назариявӣ доир гардид, хабар медиҳад АМИТ «Ховар» бо истинод ба академия.

Дар ҳамоиш олимон ва коршиносони соҳа ҷамъ омада, нуктаҳои асосии Паёми Президенти Ҷумҳурии Тоҷикистон ба Маҷлиси Олиро шарҳу тавзеҳ дода, аҳамияти стратегӣ ва таҳқиқотии ин ҳуҷҷати муҳимро таъкид намуданд.

Иштирокдорон дар мавзуъҳои «Инъикоси масъалаҳои хотираи таърихӣ ва ҳувияти миллӣ дар Паёми Президенти Ҷумҳурии Тоҷикистон», «Ҷанбаҳои иқтисодӣ ва рушди он дар Паёми Президенти Ҷумҳурии Тоҷикистон», «Нақши кибернетика дар сиёсати Пешвои миллат», «Сабабҳои ҳамроҳшавии ҷавонон ба ҳизбу ҳаракатҳои ифротгаро» ва «Масъалаҳои технологияҳои рақамӣ ва зеҳни сунъӣ дар Паёми Президенти Ҷумҳурии Тоҷикистон ба Маҷлиси Олӣ» сухан намуданд.

Таъкид гардид, ки Паёми Президенти Тоҷикистон ба Маҷлиси Олӣ дар шароити мураккаби геополитикӣ ҳамчун ҳуҷҷати стратегӣ ва роҳнамои асосии рушди устувори давлатдорӣ хизмат мекунад. Ҳар маъруза нуктаҳои муҳим ва ҷанбаҳои муҳими стратегияи рушди иқтисодӣ, сиёсӣ ва иҷтимоии мамлакатро равшан намуд.

Машварати илмӣ-назариявӣ дар маҷмуъ барои омӯзгорон, донишҷӯён ва коршиносон имконият фароҳам овард, ки Паёми Президенти Тоҷикистон ба Маҷлиси Олиро аз ҷиҳати стратегӣ, иқтисодӣ ва илмӣ таҳлил намуда, нақши онро дар рушди устувори ҷумҳурӣ дар шароити ҷаҳони муосир дарк намоянд.

АКС: Академияи идоракунии давлатии назди Президенти Ҷумҳурии Тоҷикистон