Соли 2025 аз Тоҷикистон ба Русия ба маблағи 3,4 миллион доллар ангури тар ва хушк содирот гардид

ДУШАНБЕ, 31.01.2026. /АМИТ «Ховар»/. Соли 2025 ба Федератсияи Русия дар ҳаҷми 5522,8 тонна ба маблағи 3,4 миллион доллар ангури тару тоза ва хушк содирот шудааст. Дар ин хусус 30 январ зимни нишасти матбуотӣ директори Агентии содироти назди Ҳукумати Ҷумҳурии Тоҷикистон Баҳриддин Сироҷиддинзода хабар дод.

Ба иттилои Баҳриддин Сироҷиддинзода, аз ҷониби Корхонаи воҳиди давлатии «Тоҷагропромэкспорт»-и Агентии содирот ба Федератсияи Русия 2 970,5 тонна ба маблағи қариб 16 миллион сомонӣ ангур содирот карда шуд. Дар умум аз ҷониби корхона ва филиалҳои он соли 2025 ба хориҷи мамлакат 4 237,6 тонна ангур ба маблағи 26,5 миллион сомонӣ содирот шудааст, ки 13,2 фоизи ҳаҷми содироти ҷумҳуриро ташкил менамояд.

Дар маҷмуъ, соли 2025 аз Тоҷикистон ба хориҷи ҷумҳурӣ дар ҳаҷми 32,2 ҳазор тонна ба маблағи 8,9 миллион доллар ангур содирот шудааст, ки нисбат ба соли 2024 ба маблағи 3,3 миллион (59,8 фоиз) зиёд мебошад.

Гуфта шуд, ки моҳи декабри соли 2025 зимни вохӯрии намояндагони Агентии содирот бо намояндагони мақомоти марбутаи давлатӣ ва бахши хусусии Русия шартномаҳои кафолатнок барои содироти маҳсулоти ватанӣ ба имзо расонида шуданд. Ҳамзамон барои ташкили корхонаи муштараки Тоҷикистону Русия ва сохтмони маркази агрологистикӣ барои харидорӣ, банду баст, захира ва нигоҳдории маҳсулоти кишоварзӣ дар Тоҷикистон бо мақсади содироти минбаъдаи он ба Федератсияи Русия ба тавофуқ расиданд.

Раъно НУСРАТУЛЛО,
АМИТ «Ховар»

АКС: АМИТ «Ховар»