ТЕЛЕВИЗИОНИ РАҚАМӢ. Соли равон корҳои насби таҷҳизот ва такмили қисми техникӣ оғоз мегарданд
ДУШАНБЕ, 27.01.2026 /АМИТ «Ховар»/. Бо мақсади беҳтар намудани таъминоти аҳолӣ бо телевизиони рақамӣ дар Ҷумҳурии Тоҷикистон «Барномаи давлатии пахши телевизиони рақамӣ барои солҳои 2026–2030» қабул гардид. Дар ин хусус 26 январ зимни нишасти матбуотӣ Раиси Кумитаи телевизион ва радиои назди Ҳукумати Ҷумҳурии Тоҷикистон Носир Саидзода ба хабарнигорон хабар дод.
«Нақшаи чорабиниҳо дар асоси консепсияи «Барномаи давлатии пахши телевизиони рақамӣ барои солҳои 2026–2030» таҳия карда шудааст. Бо ин мақсад дар тамоми минтақаҳои мамлакат аз ҷониби гурӯҳи кории кумита омӯзишҳо гузаронида шуданд. Аз моҳи феврали соли равон корҳои насби таҷҳизот ва такмили қисми техникӣ оғоз мегарданд», – изҳор дошт Носир Саидзода.
Ба иттилои Раиси Кумитаи телевизион ва радио, дар доираи татбиқи ин барнома таваҷҷуҳи асосӣ ба баланд бардоштани сатҳи фарогирии пахши рақамӣ дар минтақаҳои сарҳадии мамлакат, инчунин ноҳияҳои баландкӯҳ, хусусан Вилояти Мухтори Кӯҳистони Бадахшон равона карда мешавад.
Иттилоъ дода шуд, ки то имрӯз фарогирии пахши телевизиони рақамӣ дар ҷумҳурӣ ба 88 фоиз расидааст. Аз ҷумла, дар ноҳияҳои тобеи марказ 88 фоиз, Вилояти Мухтори Кӯҳистони Бадахшон — 71 фоиз, вилояти Хатлон — 90 фоиз ва дар вилояти Суғд 81 фоизро ташкил медиҳад. Ҳамзамон сатҳи фарогирии шабакаҳои радиоӣ, аз ҷумла Радиои «Тоҷикистон» 90 фоиз, «Садои Душанбе» 75 фоиз, «Фарҳанг» ва «Овози тоҷик» 65 фоиз арзёбӣ гардид.
Бояд гуфт, ки яке аз пешравиҳои муҳими солҳои охир гузариши пурраи телевизион ба пахши рақамӣ мебошад. Пахши рақамӣ сифати тасвир ва садоро чанд маротиба беҳтар намуда, барои мардум имкони тамошои шабакаҳои зиёдро фароҳам овардааст. Истифодаи дастгоҳҳои наворбардорӣ ва танзими муосир имкон дод, ки мазмуну муҳтавои барномаҳо касбӣ ва ҷолиб гардад.
Дар нишаст ҳамчунин иттилоъ дода шуд, ки соли 2025 «Барномаи давлатии рушди телевизион ва радио дар Ҷумҳурии Тоҷикистон барои солҳои 2021–2025» ҷамъбаст гардид. Татбиқи самараноки он ба рушди соҳа, бахусус телевизионҳои минтақавӣ таъсири мусбат расонид.
Дар айни замон дар мамлакат 106 шабака ва муассисаи давлатию хусусии телевизиону радио ва студияҳои истеҳсоли маҳсулоти аудиовизуалӣ фаъолият доранд.
Кумитаи телевизион ва радиои назди Ҳукумати Ҷумҳурии Тоҷикистон минбаъд низ фаъолияти худро барои такмили мундариҷа, навсозии соҳа ва баланд бардоштани сифати пахши барномаҳо дар
дохил ва хориҷи мамлакат, аз ҷумла тавассути пахши моҳвораӣ идома хоҳад дод.
Моҳинави НАВРӮЗ,
АМИТ «Ховар»
АКС: АМИТ «Ховар»
Дар Фестивали байналмилалии «Интермузей. БРИКС+» густариши ҳамкорӣ байни осорхонаҳо баррасӣ шуд
Дар Донишгоҳи технологии Тоҷикистон даври якуми Озмуни ҷумҳуриявии «Донандаи беҳтарини асарҳои Пешвои миллат» доир гардид
Бахшида ба 35-солагии робитаҳои бародаршаҳрӣ байни Душанбе ва Санкт-Петербург дар Осорхонаи миллӣ намоиши аксҳо ифтитоҳ ёфт
Аъзои ҳайати шаҳри Санкт-Петербург дар Осорхонаи миллӣ бо давраҳои пурифтихори таъриху фарҳанги бостонии тоҷикон шинос шуданд
Дабири кулли САҲА дар Осорхонаи миллии Тоҷикистон бо тамаддуни миллати тоҷик шинос шуд
Рушди ҳамкории фарҳангии Тоҷикистону Қирғизистон баррасӣ шуд
«…МОДАР ЯКТОСТ, ТОҶИКИСТОН ЯКТОСТ…». Ба зодрӯзи Шоири халқии Тоҷикистон устод Лоиқ Шералӣ 85 сол пур шуд
«МЕАНДЕШАМ, ПАС ҲАСТАМ». Таҳти ин унвон намоиши осори Рассоми халқии Тоҷикистон Суҳроб Қурбонов ташкил карда мешавад
Дар Бишкек маросими тантанавии ифтитоҳи Рӯзҳои фарҳанги Ҷумҳурии Тоҷикистон баргузор гардид
Дар Донишкадаи санъати тасвирӣ ва дизайни Тоҷикистон даврҳои омӯзишии «Эбру», 3D ва колиграфия ифтитоҳ шуданд
«ЗЕБОИИ ТОҶИКИСТОН–МЕРОС БАРОИ ОЯНДА». Дар Бишкек намоишгоҳи санъати тасвирии Тоҷикистон ифтитоҳ ёфт
Дар Хуҷанд даври шаҳрии Озмуни ҷумҳуриявии «Тоҷикистон— Ватани азизи ман» оғоз шуд
