Ҳамкории Тоҷикистон ва Руминия дар соҳаи алоқа густариш меёбад

ДУШАНБЕ, 12.03.2026 /АМИТ «Ховар»/. Масъалаҳои таҳкими ҳамкории дуҷониба дар соҳаи алоқа ва технологияҳои иттилоотӣ, танзими бозори телекоммуникатсионӣ, идоракунии спектри радиобасомадҳо, инчунин рушди инфрасохтори почта ва татбиқи технологияҳои рақамӣ дар вохӯрии ҳайати Хадамоти алоқаи назди Ҳукумати Ҷумҳурии Тоҷикистон бо Президенти Мақомоти миллии танзим ва идоракунии соҳаи алоқаи Руминия (ANCOM) Валериу Жгонеа баррасӣ шуданд.

Тавре ба АМИТ «Ховар» аз Хадамоти алоқаи назди Ҳукумати Ҷумҳурии Тоҷикистон хабар доданд, вохӯрӣ дар шаҳри Бухарести Руминия баргузор гардид.

Зимни вохӯрӣ мусоҳибон ба рушди ҳамкории мутақобили судманд ва мубодилаи таҷриба дар самти танзим ва идоракунии соҳаи алоқа таваҷҷуҳи махсус зоҳир карданд.

Ҷонибҳо барои густариши ҳамкории минбаъда, омодасозӣ ва имзои Ёддошти тафоҳум оид ба ҳамкорӣ дар соҳаи алоқа изҳори омодагӣ карданд. Таъкид шуд, ки имзои ин санад метавонад қадами муҳим дар таҳкими муносибатҳои ҳамкорӣ ва рушди минбаъдаи шарикии дуҷониба гардад.

АКС: Хадамоти алоқаи назди Ҳукумати Ҷумҳурии Тоҷикистон