Дар Лондон Наврӯзи байналмилалӣ бошукуҳ таҷлил гардид

ДУШАНБЕ, 30.03.2026. /АМИТ «Ховар»/. Дар  шаҳри Лондон аз ҷониби Сафорати Ҷумҳурии Тоҷикистон дар Шоҳигарии Муттаҳидаи Британияи Кабир ва Ирландияи Шимолӣ ҷашни Наврӯзро таҷлил карда шуд.

Тавре ба АМИТ «Ховар» аз Сафорати Ҷумҳурии Тоҷикистон дар Шоҳигарии Муттаҳидаи Британияи Кабир ва Ирландияи Шимолӣ хабар доданд, зимни барномаи консертӣ инчунин суннатҳои наврӯзӣ, наворҳои видеоӣ аз таҷлили ҷашни Наврӯз дар Тоҷикистон, гӯшаҳои фарҳангӣ, намоиши асарҳои рассоми Тоҷикистон Олим Камолзода ва пешниҳоди таомҳои миллӣ, аз ҷумла оши палов ва самбӯса ба меҳмонон муаррифӣ карда шуданд.

Инчунин дар шаҳри Кембриҷ дар доираи Форуми Донишгоҳи Кембриҷ оид ба Осиёи Марказӣ ҷашни Наврӯз таҷлил гардид. Зимни он сафоратҳои кишварҳои Осиёи Марказӣ гӯшаҳои фарҳангиро оро дода, таомҳои миллиашонро ба меҳмонони ҷашн пешкаш карданд.

Илова бар ин, дар чаҳорчӯби ҳамоиши мазкур оид ба таҳкими ҳамкории минтақавӣ барои рушди иқтисодиёти «сабз» ҳамоиш доир гардид.

АКС: Сафорати Ҷумҳурии Тоҷикистон дар Шоҳигарии Муттаҳидаи Британияи Кабир ва Ирландияи Шимолӣ