Дар ноҳияи Шуғнон шумораи гармхонаҳои муосир афзоиш меёбад

ХОРУҒ, 24.03.2026 /АМИТ «Ховар»/. Дар Ҷамоати деҳоти Поршиневи ноҳияи Шуғнон гармхонаи доимии муосир бунёд мегардад. Дарозии гармхона  80 метр ва паҳноии он 40 метр буда, корҳои сохтмониро  Ҷамъяти масъулияти маҳдуди «Ситоиш» аз ноҳияи Мастчоҳи вилояти Суғд бар уҳда дорад. Мутахассисону коргарони  ин ҷамъият дар бунёди гармхонаҳои муосир таҷрибаи ғанӣ доранд ва тасмим гирифтаанд, ки то даҳаи аввали моҳи апрел ин гармхонаи замонавиро ба истифода диҳанд.

Сардори бахши кишоварзии ноҳияи Шуғнон Абдуласан Мамадасанов гуфт, ки дар чанд соли охир  талаботи аҳолии вилоят нисбат ба сабзавоти тару тоза дар ҳама фаслҳои сол зиёд шудааст. Аз ин рӯ Мақомоти иҷроияи ҳокимияти давлатии Вилояти Мухтори Кӯҳистони Бадахшон кӯшиш мекунад, ки шумораи гармхонаҳои доимамалкунандаи муосирро афзоиш диҳад. Ба ин васила сокинони шаҳру ноҳияҳои вилоят дар фасли зимистон низ бо сабзавот таъмин карда мешаванд. Дар шароити кӯҳистон, ки замини корам кам буда, иқлими  сард то ҳафт моҳ давом мекунад, дар чаҳор фасли сол таъмин кардани аҳолӣ бо сабзавоту тару тоза хеле душвор аст. Ягона роҳи ҳалли ин масъала ҳарчӣ бештар бунёд кардани  гармхонаҳои доимамалкунанда мебошад. Ин тадбир барои рушди соҳаи кишоварзӣ заминаи мусоид фароҳам оварда, соҳибкорону кишоварзони вилоят имкон пайдо мекунанд, ки  бозорҳои ин минтақаи кӯҳсорро бо маҳсулоти босифат таъмин намоянд.

Ҳоло дар ноҳияи Шуғнон 72 гармхонаи мавсимӣ, ки масоҳати умумиашон 4 ҳазору 225 метри мураббаъ аст, аҳолиро аз оғози фасли баҳор то охири мавсими гармӣ бо навъҳои гуногуни меваю сабзавот, ба монанди помидору бодиринг, қулфинай ва кабудӣ таъмин мекунанд.