Дар Тоҷикистон ҳавои номусоид то 11 март боқӣ мемонад

ДУШАНБЕ, 10.03.2026 /АМИТ «Ховар»/. Имрӯз дар бештари ноҳияҳои Тоҷикистон ҳавои номусоид пешгӯӣ шуда, борони бошиддат меборад. Дар ин хусус АМИТ «Ховар» бо истинод ба Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон  хабар медиҳад.

Дар нимаи дуюми рӯз дар ноҳияҳои водӣ ва доманакӯҳӣ бориши борон ба барф табдил ёфта, дар ноҳияҳои кӯҳӣ бориши барф пешгӯӣ мешавад.

Иттилоъ дода шуд, ки баландии қабати барф имрӯз ва шаби 11 март дар ноҳияҳои Деваштич, Шаҳристон, Мастчоҳи Кӯҳии вилояти Суғд, Рашт, Сангвор, Лахш, Варзоби ноҳияҳои тобеи ҷумҳурӣ, ноҳияҳои Ишкошим ва Шуғнони Вилояти Мухтори Кӯҳистони Бадахшон ба 10-30 сантиметр мерасад. Инчунин дар ноҳияҳои доманакӯҳи Файзобод, Ховалинг, Муъминобод, Балҷувон, Шамсиддини Шоҳин, Панҷакент, Айнӣ, Шаҳристон ва Истаравшан баландии қабати барф ба 3 — 10 сантиметр мерасад.

Рӯзҳои 10–11 март пастшавии ҳарорати ҳаво пешгӯӣ шуда, дар водиҳо шабона  аз 4 дараҷа хунук то 1 дараҷа гарм, рӯзона 1+6 дараҷа гарм ва дар ноҳияҳои доманакӯҳӣ шабона 2–7 дараҷа хунук, рӯзона аз 1 дараҷа хунук то 4 дараҷа гарм мешавад. Инчунин дар ноҳияҳои кӯҳӣ шабона 7–12 дараҷа хунук, рӯзона аз 0–5 дараҷа хунук то 2+4 дараҷа гармӣ дар назар аст.

10-11 март дар ноҳияҳои кӯҳӣ ва дар ағбаҳои Анзобу Шаҳристон фаромадани тарма пешгӯӣ карда мешавад. Дар ноҳияҳои доманакӯҳии Панҷакент, Айнӣ, Ховалинг, Муъминобод, Шамсиддини Шоҳин ва Дарвоз омадани сел дар назар аст.

Иттилоъ дода шуд, ки имрӯз дар дарёҳои Ёхсӯ, Қизилсӯ (ҷанубӣ) ва дарёҳои аз нишебиҳои ҷанубии қаторкӯҳҳои Ҳисор ҷоришаванда баландшавии сатҳи об эҳтимол дорад. Ҳамчунин бо сабаби номусоидии ҳаво коҳишёбии дурии биниш ҳангоми бориши борон ва фаромадани туман, яхбандӣ ва мушкилии муваққатӣ дар фаъолияти соҳаи нақлиёт ва хизматрасониҳои коммуналӣ дар назар аст.

АКС: АМИТ «Ховар»