Доир ба шароити нигоҳдории солимии психологӣ дар муҳити муассисаҳои таълимӣ ҳамоиш баргузор шуд

ДУШАНБЕ, 10.03.2026 /АМИТ «Ховар»/.  Дар Донишгоҳи давлатии омӯзгории Тоҷикистон ба номи Садриддин Айнӣ таҳти унвони «Шароити нигоҳдории солимии психологӣ дар муҳити муассисаҳои таҳсилоти миёнаи умумӣ ва нақши омӯзгорону мутахассисони соҳа дар ин самт, мушкилот ва роҳҳои ҳалли он» конференсияи ҷумҳуриявӣ баргузор гардид. Дар ин хусус ба АМИТ «Ховар» аз ин донишгоҳ хабар доданд.

Иштирокдорони конференсия оид  ба аҳамияти таҳкими солимии равонӣ дар муҳити таълимӣ, нақши омӯзгор дар ташаккули шахсияти солими хонандагон ва зарурати тақвияти ҳамкории мутахассисони соҳа дар ҳалли масъалаҳои мавҷуда ибрози назар намуданд.

Коршиносон атрофи масъалаҳои марбут ба ҳифзи солимии равонии хонандагон, пешгирии мушкилоти равонӣ дар муҳити таълимӣ, таҳкими нақши омӯзгорон ва ҳамкории муассисаҳои илмӣ-таълимӣ мубодилаи афкор намуда, таклифҳои судманд пешниҳод намуданд.

Иброз гардид, ки фаъолияти бонизом ва самараноки равоншиноси муассисаҳои таълимӣ насли наврас ва ҷавонро дар руҳияи худшиносӣ, ҳифзи арзишҳои миллӣ ва риояи ахлоқи ҳамида тарбия мекунад.

Ҳамзамон таъкид шуд, ки дар шароити имрӯзаи мураккаби иҷтимоӣ ва равонӣ, ки ҷавонон дар муҳити пур аз иттилооти зудтағйирёбанда қарор доранд, нақши равоншинос дар муассисаҳои таълимӣ беш аз ҳар вақти дигар муҳим аст. Агар омӯзгор ба хонандагон дониш меомӯзонад, равоншинос вазифадор аст ба хонанда чӣ гуна бо мушкилоти эҳсосӣ мубориза бурдан, худро шинохтан ва ёфтани роҳи дурусти бартарафсозии мушкилотро нишон диҳад.

АКС: Донишгоҳи давлатии омӯзгории Тоҷикистон ба номи Садриддин Айнӣ