«Moody’s Ratings»: Рейтинги соҳибихтиёрии қарзии Тоҷикистон ба дараҷаи «B2» бо дурнамои «устувор» баланд бардошта шуд

ДУШАНБЕ, 06.03.2026 /АМИТ «Ховар»/. Агентии байналмилалии рейтингии «Moody’s Ratings» рейтинги дарозмуддати соҳибихтиёрии қарзии Ҷумҳурии Тоҷикистонро ба дараҷаи «B2» баланд бардошта, дурнамои онро «устувор» арзёбӣ намуд, иттилоъ медиҳад АМИТ «Ховар» бо истинод ба Бонки миллии Тоҷикистон.

Тоҷикистон аз соли 2014 инҷониб бо Агентии байналмилалии рейтингии «Moody’s Ratings» ҳамкорӣ дошта, ба сатҳи «B2»  баланд гардидани рейтинги соҳибихтиёрӣ нахустин маротиба ба қайд гирифта мешавад. Ин дастовард натиҷаи пайгиронаи татбиқи сиёсати мутавозини макроиқтисодӣ ва ислоҳоти сохторӣ дар кишвар арзёбӣ мегардад.

Тибқи арзёбии агентии рейтингӣ, беҳтар шудани рейтинг аз дараҷаи «B3»  ба дараҷаи «B2» ба рушди устувори иқтисодии мамлакат дар солҳои охир, таҳкими мавқеи молиявию буҷетӣ ва нигоҳ доштани нишондиҳандаҳои мусбати макроиқтисодӣ вобаста аст.

Дурнамои «устувор» инъикоскунандаи интизориҳои мусбати агентии рейтингӣ нисбат ба идомаи сиёсати оқилонаи молиявию буҷетӣ ва ҳифзи суботи макроиқтисодӣ дар давраи миёнамуҳлат мебошад. Ҳамзамон идомаи татбиқи ислоҳоти иқтисодию сохторӣ, коҳиш додани хавфҳои марбут ба устувории қарз ва таҳкими идоракунии молияи давлатӣ аз ҷумлаи омилҳое мебошанд, ки ба беҳтар гардидани арзёбии рейтинги мамлакат мусоидат кардаанд.

Баланд гардидани рейтинги соҳибихтиёрии қарзии мамлакат бозгӯи эътимоди шарикони байналмилалӣ ва бозорҳои молиявӣ ба сиёсати макроиқтисодӣ ва суботи молиявии Ҷумҳурии Тоҷикистон буда, барои густариши имконияти ҷалби сармоя, коҳиш додани арзиши қарзгирӣ ва таҳкими мавқеи кишвар дар арсаи молиявии байналмилалӣ заминаи мусоид фароҳам меорад.

 АКС: Бонки миллии Тоҷикистон