Таҳкими ҳамкории дуҷониба ва рушди бахши молиявӣ байни Тоҷикистон ва Бонки ҷаҳонӣ баррасӣ гардид

ДУШАНБЕ, 02.03.2026 /АМИТ «Ховар»/. Тақвияти ҳамкории Тоҷикистон бо Бонки ҷаҳонӣ дар мулоқоти Раиси Бонки миллии Тоҷикистон Фирдавс Толибзода бо ҳайати Гурӯҳи Бонки ҷаҳонӣ таҳти роҳбарии директори муассисаҳои молиявии Корпоратсияи байналмилалии молиявӣ /IFC/ дар кишварҳои Ховари Миёна, Осиёи Марказӣ, Туркия, Покистон ва Афғонистон хонум Момина Айҷазуддин дар шаҳри Душанбе баррасӣ гардид.

АМИТ «Ховар» бо истинод ба Бонки миллии Тоҷикистон иттилоъ медиҳад, ки дар мулоқот масоили таҳкими ҳамкории самарабахши дуҷониба, рушди бахши молиявӣ ва густариши дастрасӣ ба маблағгузорӣ барои бахши хусусӣ, бахусус соҳибкории хурду миёна муҳокима шуд.

Раиси Бонки миллии Тоҷикистон зимни муаррифии вазъи макроиқтисодӣ ва нишондиҳандаҳои бахши бонкии мамлакат бо ишора ба ҳамкории чандсолаи судманд бо Гурӯҳи Бонки ҷаҳонӣ, бахусус бо IFC иброз намуд, ки муносибатҳои шарикона дар таҳкими устувории низоми бонкӣ, ҷорӣ намудани меъёрҳои муосири идоракунии корпоративӣ, такмили низоми идоракунии хавфҳо, рушди хизматрасониҳои молиявии рақамӣ ва густариши фарогирии молиявӣ нақши назаррас гузоштаанд.

Ҷонибҳо имконияти густариши ҳамкориро дар самтҳои маблағгузории соҳибкории хурду миёна, аз ҷумла дастгирии соҳибкории занон, рушди молияи “сабз” ва устувор, рақамисозии хизматрасониҳои молиявӣ ва идоракунии хавфҳо баррасӣ намуданд.

Татбиқи ин самтҳо ба таҳкими устувории молиявӣ, густариши фарогирии хизматрасониҳои молиявӣ ва таъмини рушди пойдори бахши молиявии мамлакат мусоидат мекунад.

Ҷонибҳо дар анҷоми вохӯрӣ барои идомаи ҳамкории созанда ва самарабахш изҳори омодагӣ намуданд.

АКС: Бонки миллии Тоҷикистон