Ҳайати Тоҷикистон дар маҷлиси машваратии давлатҳои электорати Хазинаи байналмилалии асъор иштирок намуд

ДУШАНБЕ, 18.04.2026. /АМИТ «Ховар»/. Ҳайати Ҷумҳурии Тоҷикистон дар маҷлиси машваратии давлатҳои электорати Хазинаи байналмилалии асъор ва Гурӯҳи Бонки ҷаҳонӣ, ки дар доираи ҷаласаҳои баҳорӣ баргузор мегарданд, иштирок намуд. Дар ин хусус ба АМИТ «Ховар» аз Бонки миллии Тоҷикистон хабар доданд.

Дар ҷараёни ҷаласа доираи васеи масъалаҳои муҳимми молиявию иқтисодӣ, аз ҷумла таъмини суботи макроиқтисодӣ, татбиқи сиёсати пулию қарзӣ бо назардошти хатарҳои геосиёсӣ, таҳкими дурнамои рушд, инчунин таъсири номуайяниҳо дар пасманзари муноқишаҳои ҷаҳонӣ мавриди баррасӣ қарор гирифтанд.

Роҳбари ҳайати Ҷумҳурии Тоҷикистон – муовини якуми Сарвазири мамлакат Ҳоким Холиқзода нақши ниҳодҳои молиявии байналмилалиро дар рушди иқтисодию иҷтимоии мамлакат муҳим арзёбӣ намуда, иброз дошт, ки чунин ҳамоишҳо барои таҳкими муколамаи бисёрҷониба, омӯзиши таҷрибаи пешқадами кишварҳои электорат ва ҳимояи манфиатҳои кишварҳои аъзо заминаи мусоид фароҳам меоранд.

Ҳамкории зич бо Гурӯҳи Бонки ҷаҳонӣ ва Хазинаи байналмилалии асъор дар татбиқи лоиҳаҳои муҳимми инфрасохторӣ ва иҷтимоию иқтисодӣ, инчунин татбиқи ислоҳоти пайгирона дар самти сиёсати макроиқтисодӣ ва бахши молиявӣ нақши калидӣ дорад.

Ҳамчунин ба вазъи кунунии иқтисоди ҷаҳонӣ, ки зери таъсири омилҳои геосиёсӣ, номуайянии занҷираҳои таъминот ва хавфҳои иқлимӣ қарор дорад, ишора гардида, зарурати таҳкими ҳамкории байналмилалӣ, рушди савдои озод ва дастгирии ҳамоҳангшудаи молиявӣ таъкид карда шуд.

АКС: Бонки миллии Тоҷикистон