Ҳамкории Донишгоҳи байналмилалии сайёҳӣ ва соҳибкории Тоҷикистон бо муассисаҳои таҳсилоти олии Русия тақвият меёбад

ДУШАНБЕ, 17.04.2026. /АМИТ «Ховар»/. Донишгоҳи байналмилалии сайёҳӣ ва соҳибкории Тоҷикистон ҳамкориро бо муассисаҳои таҳсилоти олии Федератсияи Русия тақвият медиҳад.

АМИТ «Ховар» бо истинод ба Донишгоҳи байналмилалии сайёҳӣ ва соҳибкории Тоҷикистон иттилоъ медиҳад, ки дар доираи Форуми тиҷоратии «Ҳамкории давлат, илм ва бахши хусусӣ дар таъмини рушди устувори соҳибкорӣ» директори Институти илмию тадқиқотии сайёҳӣ ва соҳибкории Донишгоҳи байналмилалии сайёҳӣ ва соҳибкории Тоҷикистон Раъно Ҳошимзода бо намояндагони муассисаҳои олии таълимии Федератсияи Русия мулоқот намуд. Зимни мулоқот дурнамои самтҳои ҳамкорӣ баррасӣ карда шуд.

Дар мулоқот масъулини Донишгоҳи давлатии иқтисод ва идоракунии Новосибирск ва Донишгоҳи иқтисодии Русия ба номи Г.В. Плеханов Ирина Боброва ва Анна Кошевлева доир ба самтҳои афзалиятноки тақвияти ҳамкорӣ, хусусан дар самти омодасозии кадрҳои соҳаи сайёҳӣ ва иқтисодӣ ибрози назар намуданд.

Мусоҳибон инчунин масъалаҳои муҳими рушди ҳамкории илмию таълимӣ, табодули таҷриба дар самти омодасозии кадрҳои баландихтисос, густариши ҳамкорӣ дар соҳаи сайёҳӣ ва соҳибкориро мавриди баррасӣ қарор доданд. Таваҷҷуҳи махсус ба татбиқи барномаҳои муштараки таҳсилотӣ, гузаронидани таҳқиқоти илмӣ ва ташкили чорабиниҳои муштарак равона гардид.

Ҷонибҳо ҳамзамон барои таҳкими робитаҳои дуҷониба ва татбиқи лоиҳаҳои муштарак дар самтҳои афзалиятноки иқтисод ва сайёҳӣ изҳори омодагӣ намуданд. Таъкид шуд, ки чунин ҳамкорӣ метавонад ба рушди устувори соҳаи соҳибкорӣ ва баланд бардоштани сатҳи омодасозии мутахассисон мусоидат кунад.

АКС: Донишгоҳи байналмилалии сайёҳӣ ва соҳибкории Тоҷикистон