Дар Душанбе ҷаласаи ҷашнии Шурои нозирони Созмони ҳамкории роҳҳои оҳан баргузор мешавад
ДУШАНБЕ, 09.04.2026. /АМИТ «Ховар»/. Моҳи июн дар Душанбе ҷаласаи 53-юми ҷашнии Шурои нозирони Созмони ҳамкории роҳҳои оҳан дар иртибот ба 70 –солагии таъсиси ин созмон баргузор мегардад, иттилоъ медиҳад АМИТ «Ховар».
Интизор меравад, ки дар ҷаласа масъалаҳои марбут ба рушди ҳамлу нақли байналмилалии боркашонӣ ва мусофиркашонӣ дар доираи ин созмон баррасӣ гарданд.
Иштирокдорони ҷаласаи 53-юми Шурои нозирони Созмони ҳамкории роҳҳои оҳан мавзеъҳои таърихию фарҳангии шаҳри Душанбе, аз ҷумла маҷмааи «Кохи Наврӯз» ва дигар маконҳои сайёҳии Душанберо тамошо мекунанд.
Бояд гуфт, ки Созмони ҳамкории роҳҳои оҳан созмони байналмилалӣ аст, ки 28 июни соли 1956 дар София бо мақсади рушди ҳамлу нақли байналмилалии боркашонӣ ва мусофиркашонӣ асосан байни Аврупо ва Осиё ва такмили қонунгузории нақлиёти роҳи оҳан ва ҳамкории техникӣ таъсис дода шудааст. Созмони ҳамкории роҳҳои оҳан мақомоти роҳи оҳан ва корхонаҳои 30 кишвари ҷаҳонро муттаҳид карда, қароргоҳаш дар Варшава воқеъ аст.
Ташкили фазои ягонаи роҳи оҳан, баланд бардоштани рақобатпазирии нақлиёти роҳи оҳани Авруосиё ва рушди ҳамлу нақли контейнерӣ ва омехта аз ҳадафҳои асосии Созмони ҳамкории роҳҳои оҳан арзёбӣ мегардад.
То соли 2023 30 кишвари Аврупо ва Осиё аъзои Созмони ҳамкории роҳҳои оҳан буданд. Конфронси вазирон (мақоми олӣ) ва Конфронси директорони генералӣ (дар сатҳи корхонаҳои роҳи оҳан) аз мақомоти роҳбарикунандаи созмон мебошад.
Мақомоти иҷроияи созмон Кумитаи Созмони ҳамкории роҳҳои оҳан буда, фаъолияти Созмони ҳамкории роҳҳои оҳан ба таҳияи чаҳорчӯбаи танзимкунанда, муттаҳид кардани қайдҳои боркашонӣ (CMGS/SMGS) ва таҳияи сиёсати тарифӣ ва техникии ҳамоҳангшуда равона гардидааст. Дарозии умумии амалиётии роҳҳои оҳан дар кишварҳои аъзои Созмони ҳамкории роҳҳои оҳан беш аз 340,000 км арзёбӣ мегардад. Созмони ҳамкории роҳҳои оҳан инчунин бо созмонҳои байналмилалӣ, аз қабили Комиссияи Аврупоии иқтисодии Созмони Милали Муттаҳид, Комиссияи иқтисодию иҷтимоӣ барои Осиё ва Уқёнуси Ором, Иттиҳоди байналмилалии роҳи оҳан, Иттиҳоди иқтисодии АвруОсиё ва ғайра фаъолона ҳамкорӣ мекунад. Созмони ҳамкории роҳҳои оҳан ба таври фаъол ёддошти ягонаи CIM/SMGS-ро амалӣ месозад, ки расмиёти марзиро сода карда, суръат мебахшад. Ин созмон ҳамзамон дар рушди долонҳои трансконтиненталӣ, беҳтар намудани бехатарии экологӣ ва самаранокии энергетикии нақлиёти роҳи оҳан нақши калидӣ мебозад.
Марзия САИДЗОДА,
АМИТ «Ховар»
АКС: АМИТ «Ховар»
Дар Душанбе татбиқи «Барномаи рушди таҳвилгарон ва содирот» бо ҳайати Гурӯҳи Бонки ҷаҳонӣ баррасӣ гардид
Дурнамои рушди ҳамкорӣ байни Тоҷикистон ва Чехия дар соҳаи нақлиёти роҳи оҳан баррасӣ гардид
Масъалаи истифодаи механизмҳои нави маблағгузорӣ барои татбиқи лоиҳаҳои афзалиятноки Тоҷикистон дар Бангкок баррасӣ шуд
РУШДИ ИҚТИСОДИ МИЛЛӢ. Дар нуҳ моҳи соли 2026 8,3 фоиз таъмин гардид
Олимони тоҷик парвариши гандуми тирамоҳӣ ва пахтаро дар шароити тағйирёбии иқлим баррасӣ намуданд
Ҷалби сармоя барои татбиқи лоиҳаҳои афзалиятноки Тоҷикистон дар Бангкок баррасӣ гардид
«СОҲИБКОРИИ ЗАНОН: ИМКОНИЯТҲО, НАВОВАРӢ ВА РУШДИ УСТУВОР».Таҳти ин унвон ҳамоиш баргузор шуд
Дар мавзуи дастгирии соҳибкорӣ дар 35 соли Истиқлоли давлатӣ ҳамоиш баргузор шуд
Дар Рим имкониятҳои содиротии маҳсулоти кишоварзии Тоҷикистон муаррифӣ гардиданд
Дар шаҳри Бангкок мулоқоти вазирони молия ва раисони бонкҳои марказии кишварҳои Осиёи Марказӣ ва Қафқоз баргузор шуд
РӮЗИ БАЙНАЛМИЛАЛИИ ЗАНОНИ ДЕҲОТ. Дар Тоҷикистон беш аз 3 миллион занон дар деҳот зиндагӣ менамоянд
ИМРӮЗ-РӮЗИ КИШОВАРЗОН. Ин соҳа зиёда аз 61 фоизи аҳолиро бо ҷойи кор фаро гирифтааст
