Дар Душанбе Форуми дуҷонибаи соҳибкорӣ баргузор гардид

ДУШАНБЕ, 23.04.2026. /АМИТ «Ховар»/. 21 апрел дар шаҳри Душанбе Форуми соҳибкории Тоҷикистон ва Эстония доир гардид.

Тавре аз Палатаи савдо ва саноати Ҷумҳурии Тоҷикистон ба АМИТ «Ховар» иттилоъ доданд, форум дар доираи ҳамкории дуҷонибаи Палатаи савдо ва саноати Ҷумҳурии Тоҷикистон ва Палатаи савдо ва саноати Эстония баргузор шуд.

Дар кори он 8 ширкати эстонӣ ва зиёда аз 40 ширкати ватанӣ, ки дар самтҳои металлургия, металлҳои ранга ва коркарди партовҳои металлӣ, технологияҳои IT, логистика, саноати чӯб ва коркарди он, инчунин истеҳсоли маҳсулоти қаннодӣ ва шоколад фаъолият доранд, иштирок намуданд.

Иттилоъ дода шуд, ки форум ҳамчун платформаи муассир барои барқарор намудани робитаҳои тиҷоратӣ, табодули таҷриба ва баррасии дурнамои ҳамкории дуҷониба хизмат намуд.

Дар доираи форум байни Палатаи савдо ва саноати Ҷумҳурии Тоҷикистон ва Палатаи савдо ва саноати Эстония Ёддошти тафоҳум оид ба ҳамкорӣ ба имзо расонида шуд.

Намояндагони Эстония ҳамчунин бо фаъолияти IT-Park Dushanbe, Ҷамъияти дорои масъулияти маҳдуди «Рухом», Ҷамъияти дорои масъулияти маҳдуди «Шоколатье», Ҷамъияти дорои масъулияти маҳдуди «555 МПК», корхонаи Ҷамъияти дорои масъулияти маҳдуди «Оҳангудоз», Ҷамъияти дорои масъулияти маҳдуди «Avas Zafaron» ва Корхонаи воҳиди давлатии «Почтаи тоҷик» шинос гардиданд.

АКС: Палатаи савдо ва саноати Ҷумҳурии Тоҷикистон