Дар Душанбе савдои фаромарзии бекоғаз ва экосистемаи рақамии тиҷорати электронӣ баррасӣ гардид

ДУШАНБЕ, 08.04.2026. /АМИТ «Ховар»/. Дар шароити рушди босуръати тиҷорати электронӣ дар мамлакат такмили механизмҳои амалкунандаи танзим аҳамияти калидӣ пайдо намуда, нисбат ба идоракунии самараноки равандҳои савдо талаботи нав ба миён омадааст. Чунин гуфта шуд  дар ҳамоише, ки таҳти унвони  «Савдои фаромарзии бекоғаз ва экосистемаи рақамии тиҷорати электронӣ дар Ҷумҳурии Тоҷикистон» дар шаҳри Душанбе баргузор гардид.

АМИТ «Ховар» бо истинод ба Агентии инноватсия ва технологияҳои рақамии назди Президенти Ҷумҳурии Тоҷикистон иттилоъ медиҳад, ки ҳамоиш бо ибтикори Ассотсиатсияи иштирокчиёни тиҷорати электронии Тоҷикистон таҳти сарпарастии Агентии инноватсия ва технологияҳои рақамии назди Президенти Ҷумҳурии Тоҷикистон ва бо дастгирии Маркази байналмилалии соҳибкории хусусӣ (CIPE) ташкил карда шуд.

Дар ҳамоиш намояндагони мақомоти калидии давлатӣ, бахши хусусӣ ва шарикони рушд иштирок намуданд.

Таҳияи қарорҳои ҳамоҳангшуда барои пешбурди табдили рақамии равандҳои савдо, баланд бардоштани шаффофияти иқтисодӣ ва таҳкими ҳамоҳангсозии институтсионалӣ аз ҳадафҳои асосии ҳамоиш арзёбӣ гардид.

Гуфта шуд, ки рушди минбаъда гузариш аз қарорҳои ҷудогона ба низоми ҳамгирои рақамии идоракунии савдоро тақозо менамояд. Дар ин замина ҳамчун самтҳои афзалиятнок принсипҳои  идоракунӣ бар асоси маълумот, автоматизатсияи расмиёти маъмурӣ, ҳамгироии фарогири системаҳои давлатӣ ва хусусӣ ва татбиқи назорати ба хавф нигаронида муайян гардиданд.

Таъкид гардид, ки ташаккули экосистемаи ягонаи рақамии тиҷорати электронӣ ҳамчун омили муҳими таъмини рушди устувори иқтисодӣ, баланд бардоштани рақобатпазирии миллӣ ва густариши иштироки Тоҷикистон дар савдои байналмилалӣ арзёбӣ мегардад.

АКС: Агентии инноватсия ва технологияҳои рақамии назди Президенти Ҷумҳурии Тоҷикистон