Дар Хуҷанд сохтмони бинои иловагии гимназияи рақами№4 оғоз гардид

ДУШАНБЕ, 19.04.2026 /АМИТ «Ховар»/. Дар шаҳри Хуҷанд ба сохтмони боз як бинои нави таълимӣ дар назди гимназияи рақами №4 санги асос гузошта шуд. Дар ин хусус ба АМИТ «Ховар» аз хадамоти матбуоти Раиси вилояти Суғд иттилоъ доданд.

Иншооти нави соҳаи маориф барои 1000 хонанда дар як баст пешбинӣ шуда, бо саҳми соҳибкорон сохта мешавад. Дар бино тамоми шароити зарурии таълим фароҳам оварда хоҳад шуд.

Раиси вилояти Суғд Раҷаб Аҳмадзода иброз намуд, ки бунёди муассисаҳои таълимӣ дар асоси дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон амалӣ гардида, татбиқи чунин ташаббусҳо имкон медиҳад хонандагон дар шароити муосир ба таълиму тарбия фаро гирифта шаванд.

Итилоъ дода шуд, ки қаблан низ бо иқдоми соҳибкорони ватандӯст дар назди гимназияи мазкур бинои замонавии таълимӣ бунёд шуда буд. Бо назардошти зиёд будани шумораи хонандагон зарурати сохтмони бинои иловагӣ ба миён омад.

Дар айни замон дар гимназияи рақами №4-и шаҳри Хуҷанд беш аз 3200 хонанда таҳсил менамоянд.

АКС: Хадамоти матбуоти Раиси вилояти Суғд