Дар Конфронси чоруми байналмилалии сатҳи баланд дар Душанбе ҳайати бонуфуз аз Миср иштирок менамояд

ДУШАНБЕ, 20.04.2026. /АМИТ «Ховар»/. Интизор меравад, ки ҳайати Ҷумҳурии Арабии Миср дар Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор, 2018-2028», ки аз 25 то 28 май дар шаҳри Душанбе баргузор мегардад, иштирок намояд. Ин масъала дар мулоқоти Вазири энергетика ва захираҳои оби Ҷумҳурии Тоҷикистон Далер Ҷумъа ва Сафири навтаъйини фавқулода ва мухтори Ҷумҳурии Арабии Миср Тамер Фатҳӣ Абдуссалом Ҳаммад дар шаҳри Душанбе баррасӣ гардид. Дар ин хусус АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон иттилоъ медиҳад.

Вазири энергетика ва захираҳои об вобаста ба имконоти фарохи сармоягузорӣ дар Тоҷикистон, аз ҷумла дар бахшҳои гидроэнергетика, истифодаи манбаъҳои барқароршавандаи энергия, идоракунии захираҳои об ва татбиқи инфрасохтори муосир маълумоти муфассал пешниҳод намуд.

Дар идомаи суҳбат ҳайати Ҷумҳурии Арабии Миср барои иштирок дар Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор, 2018-2028» даъват карда шуд.

Ҷонибҳо барои таҳкими минбаъдаи ҳамкории мутақобили судманд ва густариши муколамаи созанда байни ду давлат изҳори омодагӣ намуданд.

АКС: Вазорати энергетика ва захираҳои оби Ҷумҳурии Тоҷикистон