Дар Маҷлиси намояндагон бо Гурӯҳи дӯстӣ ва ҳамкории парлумонии Олмон—Осиёи Марказӣ мулоқот баргузор шуд

ДУШАНБЕ, 23.04.2026. /АМИТ «Ховар»/. Имрӯз мулоқоти маҷозии Гурӯҳи дӯстӣ ва ҳамкории байнипарлумонии Маҷлиси намояндагони Маҷлиси Олии Ҷумҳурии Тоҷикистон бо Гурӯҳи дӯстӣ ва ҳамкории парлумонии Олмон—Осиёи Марказӣ баргузор гардид. Дар ин хусус ба АМИТ «Ховар» аз Маҷлиси намояндагон хабар доданд.

Роҳбари гурӯҳи дӯстӣ ва ҳамкории байнипарлумонии Маҷлиси намояндагони Маҷлиси Олии Ҷумҳурии  Тоҷикистон бо Гурӯҳи дӯстӣ ва ҳамкории парлумонии Олмон — Осиёи Марказӣ, раиси кумитаи Маҷлиси намояндагон оид ба энергетика, саноат, сохтмон ва коммуникатсия Маҳмадулло Шерализода иброз намуд, ки муносибатҳои дипломатӣ байни Ҷумҳурии Тоҷикистон ва Ҷумҳурии Федеративии Олмон 28 феврали соли 1992 барқарор шуда, пайваста рушд меёбанд.

Робитаҳои дуҷонибаи ҳарду давлатро мулоқоти Сарони давлатҳои «Осиёи Марказӣ ва Ҷумҳурии Федеративии Олмон», гуфтушунидҳо ва машваратҳои байниҳукуматии ҳарсола, машваратҳои сиёсии байниидоравии вазоратҳои корҳои хориҷӣ, боздидҳои мутақобили сиёсатмадорон, намояндагони парлумон, вазоратҳои мудофиа, ниҳодҳои қудратӣ, ҳамоишҳои соҳибкорони ҳарду давлат, робитаҳои мустақими муассисаҳои пажӯҳишӣ-таълимӣ ташкил медиҳанд.

Омили танзимкунандаи муносибатҳои дуҷониба заминаи шартномавӣ-ҳуқуқии ҳарду давлат мебошад. То ба имрӯз байни Тоҷикистон ва Олмон 42 санади дуҷониба ба имзо расидааст. Аз теъдоди мазкур 31 санадро созишномаҳои байниҳукуматӣ, 10 санадро созишномаҳои байниидоравӣ ва 1 санадро изҳороти муштарак ташкил медиҳанд.

Дар муносибатҳои муосир робитаҳои байнипарлумонии ҳарду давлат инкишофи густурда меёбанд.

АКС: Маҷлиси намояндагони Маҷлиси Олии Ҷумҳурии Тоҷикистон