Дар ноҳияи Рашт дар 1650 гектар замин картошка кишт карда мешавад

РАШТ, 26.04.2026. /АМИТ «Ховар»/. Соли 2026 деҳқонони ноҳия Рашт дар 1650 гектар заминҳои кишоварзӣ картошка кишт менамоянд. Ҳамчунин дар заминҳои корами обию лалмии хоҷагиҳои деҳқонӣ, хоҷагиҳои ёрирасону заминҳои наздиҳавлигӣ, ки ҳамаи шаклҳои хоҷагидориро ташкил медиҳад дар 3510  гектар замин картошка кишт карда мешавад. Дар ин хусус ба хабарнигори АМИТ «Ховар»  муовини Раиси  ноҳияи Рашт Саидбек Идибегзода иттилоъ дод.

Саидбек Идибегзода гуфт, ки имсол 90 фоизи   деҳқонони ноҳия навъҳои картошкаи «Тоҷикистон-24»,  «Покистон», «Русия» ва картошкаи маҳалии ноҳияҳои Масчоҳу Деваштичро  кишт намуда истодаанд.

Дар ноҳияи Рашт барои кишти саривақтии картошка 427 техника ва  мошинолоти кишоварзӣ сафарбар карда шудаанд.

Картошкапарварӣ яке аз самтҳои асосии кишоварзони ноҳияи Рашт мебошад, ки  барои таъмини амнияти озуқаворӣ, зиёд намудани имкониятҳои содиротии мамлакат ва ба кори доимӣ таъмин кардани аҳолии деҳот нақши муҳим дорад.

Имрӯзҳо дар хоҷагиҳои деҳконӣ ва заминҳои наздиҳавлигию ёрирасони ноҳия кишти картошка оғоз гардид. Сокинони ноҳияи Рашт аз ҳавои мусоид истифода намуда, барои самаранок истифода бурдани ҳар як қитъа замин  ба кишти зироатҳои гуногуни  кишоварзӣ машғул мебошанд.

АКС: Мақомоти иҷроияи ҳокимияти давлатии ноҳияи Рашт