Деҳқонони хоҷагии «Ёрмуҳаммад»-и ноҳияи Кӯшониён бозори дохилиро бо маҳсулоти барвақтӣ таъмин менамоянд

ДУШАНБЕ, 26.04.2026. /АМИТ «Ховар»/. Кишоварзони хоҷагии деҳқонии «Ёрмуҳаммад»-и ноҳияи Кӯшониён заминҳои дар ихтиёрдоштаашонро самаранок ва мақсаднок истифода бурда, дар таъмини бозори истеъмолӣ бо маҳсулоти тару тозаи кишоварзӣ саҳми назаррас мегузоранд.

Тавре роҳбари хоҷагии деҳқонии «Ёрмуҳаммад» Сулаймон Шафоев ба хабарнигори АМИТ «Ховар» иброз дошт, дар хоҷагӣ кишту парвариши зироати барвақтӣ, аз ҷумла гулкарам, карам, қулфинай, пахта, гулу буттаҳо ва дигар растаниҳои ороишӣ ба роҳ монда шудааст.

Иттилоъ дода шуд, ки зироати барвақтӣ, қулфинай, гулу буттаҳо ва дигар растаниҳои ороишӣ дар гармхонаҳои мутобиқ ба талаботи муосир парвариш карда шуда, дар ин самт 20 нафар сокинони маҳаллӣ бо ҷойи кор таъмин гардидаанд.

«Ҳар як зироат вобаста ба хусусиятҳои худ талаботи махсус дошта, кишоварзон онро бо риояи қоидаҳои агротехникӣ дар қитъаҳои алоҳида парвариш менамоянд. Нигоҳубини дуруст, коркарди техникӣ ва таъмини саривақтии ғизои замин аз ҷумлаи омилҳои асосии баланд бардоштани ҳосилнокӣ арзёбӣ мегарданд», – илова намуд Сулаймон Шафоев.

Дар ин хоҷагӣ қулфинайро дар гармхонаҳо охири моҳи август шинонида будаанд. Он аз нимаи дуюми моҳи ноябр ба ҳосил даромадааст. Айни замон ҷамъоварии ҳосил идома дошта, хоҷагӣ ин маҳсулоти тару тозаро ба бозорҳои истеъмолӣ пешниҳод намуда истодааст.

Бо чунин фаъолияти босамар кишоварзони ин хоҷагии деҳқонӣ дар баробари ба даст овардани даромади хуб, дар таъмини бозори дохилӣ бо маҳсулоти босифати ватанӣ саҳми арзишманд мегузоранд.

АКС: АМИТ «Ховар»