Дурнамои ҳамкорӣ байни Ҳизби Халқии Демократии Тоҷикистон ва Ҳизби Коммунистии Чин баррасӣ гардид

ДУШАНБЕ, 27.04.2026. /АМИТ «Ховар»/. Муовини якуми Ҳизби Халқии Демократии Тоҷикистон Маликшо Неъматзода дар шаҳри Пекин бо аъзои Кумитаи иҷроияи марказии Ҳизби Коммунистии Ҷумҳурии Мардумии Чин,  мудири шуъбаи байналмилалии ин ҳизб Лю Хайсин вохӯрӣ намуд.

Тавре ба АМИТ «Ховар» аз Ҳизби Халқии Демократии Тоҷикистон хабар доданд, зимни вохӯрӣ ҷонибҳо вазъи кунунӣ ва дурнамои ҳамкории байниҳизбии ду давлатро баррасӣ намуданд. Таъкид гардид, ки ба имзо расонидани меморандуми мувофиқагардида дар ояндаи наздик метавонад барои густариши марҳилаи нави ҳамкорӣ  заминаи мусоид фароҳам оварад.

Ҳамзамон Маликшо Неъматзода Лю Хайсинро барои иштирок дар Форуми ҳизбҳои сиёсӣ, ки бахшида ба 35-солагии Истиқлолияти давлатии Ҷумҳурии Тоҷикистон аз 10 то 12 июни соли 2026 дар шаҳри Душанбе  баргузор мегардад, даъват намуд.

Ёдовар мешавем, ки ҳайати Тоҷикистон дар ҷараёни сафар бо таҷрибаи Ҳизби Коммунистии Чин дар самти ҳалли масъалаҳои иҷтимоӣ, аз ҷумла коҳиш додани сатҳи камбизоатӣ аз наздик шинос гардид.

АКС: Ҳизби Халқии Демократии Тоҷикистон