Форуми сеюми байналмилалии «Суғд – чорроҳаи Роҳи бузурги Абрешим» баргузор мешавад

ДУШАНБЕ, 15.04.2026. /АМИТ «Ховар»/. 16-17 апрел дар шаҳри Хуҷанд  Форуми сеюми байналмилалии «Суғд – чорроҳаи Роҳи бузурги Абрешим» доир мегардад, хабар медиҳад АМИТ «Ховар».

Форум бо мақсади пешбурди соҳаи сайёҳӣ, ҷалби бештари сайёҳон, муаррифии имконияти сайёҳӣ ва таърихии вилоят баргузор карда мешавад.

Вилояти Суғд бо таърихи куҳан, табиати зебо ва анъанаҳои бойи мардумӣ минтақаи ояндадори сайёҳӣ мебошад. Таваҷҷуҳи рӯзафзуни сайёҳон ва сармоягузорони дохилию хориҷӣ ба рушди соҳаи сайёҳӣ дар ин вилоят шаҳодати равшани имконияти фаровони он аст.

Мавзеъҳои табиии ин минтақа, махсусан кӯлҳо ва дараҳои баландкӯҳи он барои сайёҳони табиатдӯст имконият фароҳам овардаанд, ки сайру саёҳатро дар ин маконҳо бофароғат гузаронанд. Искандаркӯл, дараҳои Яғнобу Фон ва минтақаҳои кӯҳии ноҳияи Айнӣ дорои шароити хуб барои хаймазанӣ, кӯҳнавардӣ ва экосайёҳӣ мебошанд.

Бояд гуфт, ки дар вилоят бунёди даҳҳо иншооти соҳаи сайёҳӣ идома дошта, то истиқболи ҷашни 35-солагии Истиқлоли давлатӣ ба истифода дода мешаванд. Ин ба таъсиси ҷойи кор, беҳтар шудани инфрасохтор ва татбиқи «Стратегияи рушди сайёҳӣ барои давраи то соли 2030» мусоидат мекунад.

АКС аз манбаъҳои боз