Green Wi-Fi: интернет ҳангоми сайру гашт дастрастар мегардад

ДУШАНБЕ, 21.04.2026. /АМИТ «Ховар»/. Сайёҳон ва сокинони шаҳрҳои бузурги Тоҷикистон метавонанд паёмакҳоро бисанҷанд, аксҳо гузоранд ё бевосита видеоро ҳангоми сайру гашт, бе пардохти маблағ барои трафики интернет тамошо кунанд. Дар боғҳо ва ҷойҳои ҷамъиятии шаҳрҳои Душанбе, Бохтар, Кӯлоб ва Хоруғ шабакаи Green Wi-Fi аз ширкати “МегаФон Тоҷикистон” фаъолият мекунад. Лоиҳа аллакай маконҳои калидиро фаро гирифта, васеъшавиро идома медиҳад.

— Дар Душанбе Wi-Fi аз оператор дар боғҳои ба номи С. Айнӣ, А. Дониш, Куруши Кабир, А. Фирдавсӣ, Рӯдакӣ ва Ҷавонон, толори вуруди Фурудгоҳи байналмилалии Душанбе, инчунин дар хиёбони Рӯдакӣ 100 бо фарогирӣ ба самти боғи Истиқлол фаъол аст. Дар шаҳрҳои Бохтар, Кӯлоб ва Хоруғ Green Wi-Fi дар боғҳои марказӣ ва ҷойҳои маъруфи истироҳати шаҳрвандон фаъол аст. Интернети ройгон ба корбарон барои вақти муайян, то 30 дақиқа дастрас мебошад. Барои истифодаи тӯлонитар аз Шабака пайвасткунии бастаи пулакӣ бо ҳаҷми зарурии трафик кифоя аст.

Green Wi-Fi-ро чӣ тавр истифода бурдан мумкин аст:

— ба шабакаи Green Wi-Fi пайваст шавед – саҳифаи бақайдгирӣ ба таври автоматӣ кушода мешавад;

— роҳи воридшавиро тавассути SMS интихоб намоед;

— рақами телефони мобилиро ворид карда, рамзи тасдиқкуниро қабул намоед;

— рамзро ба саҳифаи бақайдгирӣ ворид кунед;

— бастаи ройгон (10 ё 30 дақиқа) ё пулакиро интихоб кунед;

— барои дастрасии ройгон тамошои ролики таблиғотӣ зарур аст.

“Мо Green Wi-Fi-ро на танҳо ҳамчун хизматрасонии мувофиқ барои ҳаёти ҳаррӯза рушд медиҳем. Мавҷудияти Green Wi-Fi дар кӯчаҳо, маконҳои дӯстдоштаи фароғатӣ, дар назди ҷойҳои асосии тамошобоб ба пайдо кардани таассуроти мусбат дар бораи кишвари мо мусоидат мекунад. Ҳам сайёҳон ва ҳам сокинони шаҳрҳо имконияти озодона истифода бурдани хизматрасониҳои рақамӣ ва ба дигарон расонидани лаҳзаҳои рангини сайру гаштро пайдо мекунанд”, — мегӯяд Олег Гребенков, роҳбари самти фурӯшҳо ва хизматрасонии ТМСБ ширкати “МегаФон Тоҷикистон”.