Маркази «Ганҷинаи ҳунаристони маърифат ва фарҳанги миллӣ» ба фаъолият оғоз намуд

ДУШАНБЕ, 21.04.2026. /АМИТ «Ховар»/. Бахшида ба 35 — солагии Истиқлолияти давлатӣ  дар Донишгоҳи байналмилалии забонҳои хориҷии Тоҷикистон ба номи Сотим Улуғзода таҳти унвони «Истиқбол аз Истиқлол: Ганҷинаи ҳунаристони маърифат ва фарҳанги миллӣ» маркази фарҳанг ва маърифати миллӣ ифтитоҳ гардид.

Тавре ба АМИТ «Ховар» аз Донишгоҳи байналмилалии забонҳои хориҷии Тоҷикистон ба номи Сотим Улуғзода хабар доданд, марказ дар се бахш фаъолият менамояд.

Яке аз гӯшаҳои марказ «Дасторо» номгузорӣ гардида, дар он беҳтарин ҳунарҳои дастӣ, аз ҷумла гулдӯзию зардӯзӣ, бофандагию порадӯзӣ, зару зевари сирф миллӣ ва намунаи беҳтарин либосҳои миллии занона, тоқиҳои се минтақаи Тоҷикистони ба намоиш гузошта шудаанд.

Гӯшаи дуюм бо номи «Китобнамо» фаъолият намуда, дар он беҳтарин дастовардҳои омӯзгорони донишгоҳ, махсусан тарҷумаи китоби мондагори Президенти Ҷумҳурии Тоҷикистон муҳтарам Эмомалӣ Раҳмон ба маърази тамошо гузошта шудааст.

Дар гӯшаи сеюм, ки «Ширинсаро» номгузорӣ шудааст, беҳтарин шириниҳо, нӯшокию хӯришҳои тезтайёр, ки аз ҷониби таълимгирандагони Парки техникии донишгоҳ омода шудаанд, ба намоиш – фурӯш гузошта шудаанд.

Ифтитоҳи ин ҳунаристон туҳфаи арзанда ба пешвози ҷашни 35-солагии Истиқлолияти давлатии Ҷумҳурии Тоҷикистон барои кормандону омӯзгорон ва донишҷӯёни донишгоҳ мебошад.

АКС: Донишгоҳи байналмилалии забонҳои хориҷии Тоҷикистон ба номи Сотим Улуғзода