Монографияи илмӣ оид ба журналистикаи сайёҳӣ ба нашр расид

ДУШАНБЕ, 30.04.2026 /АМИТ «Ховар»/. Таҳти унвони «Бозтоб ва тарғиби  caйёҳӣ вa ҳунapҳoи мapдумӣ дар нашрияҳои «Хатлон» ва «Сафо»»  монографияи номзади илмҳои филологӣ, омӯзгори кафедраи рӯзноманигории Донишгоҳи давлатии Бохтар ба номи Носири Хусрав Комрон Расулзода дар матбааи «Торус»-и шаҳри Душанбе бо теъдоди 100 нусха ба нашр расид, хабар медиҳад АМИТ «Ховар».

Монографияи мазкур бо тавсияи Шурои илмӣ-методии Донишгоҳи давлатии Бохтар ба номи Носири Хусрав ба чоп пешниҳод гардида, ба таҳқиқи илмии вижагиҳои инъикоси мавзуъҳои сайёҳӣ ва фарҳанги миллӣ дар матбуоти даврӣ бахшида шудааст.

Муаллиф дар доираи пажуҳиши худ масъалаҳои назариявӣ ва амалии ташаккули журналистикаи соҳавӣ, аз ҷумла тревел-журналистика, эко-журналистика ва журналистикаи иқтисодиро мавриди таҳлили амиқ қарор додааст.

Дар китоб роҳу усулҳои муассири инъикоси захираҳои табиии нодир, ёдгориҳои таърихиву фарҳангӣ ва мавзеъҳои зиёратӣ дар вилояти Хатлон баррасӣ гардида, таваҷҷуҳи асосӣ ба нақши нашрияҳои «Хатлон» ва «Сафо» дар ташаккули афкори ҷамъиятӣ ва муаррифии имкониятҳои сайёҳии минтақа равона шудааст. Натиҷаҳои таҳқиқот нишон медиҳанд, ки инъикоси касбӣ ва ҳадафманди мавзуъҳои сайёҳӣ метавонад ба рушди иқтисоди минтақавӣ, баланд бардоштани нуфузи фарҳанги миллӣ ва таҳкими худшиносии ҷомеа мусоидат намояд. Ҳамзамон, дар монография масъалаҳои методологии таҳияи маводи журналистӣ, интихоби жанрҳо ва риояи меъёрҳои касбӣ мавриди баррасӣ қарор гирифтаанд.

Аҳамияти амалии монография дар он ифода меёбад, ки он метавонад ҳамчун манбаи муфид барои донишҷӯён, магистрантон ва муҳаққиқони соҳаи журналистика, инчунин барои мутахассисони соҳаи сайёҳӣ, реклама ва робита бо ҷомеа (PR) хизмат намояд. Тавсияҳои пешниҳодгардида барои такмили фаъолияти касбии рӯзноманигорон ва баланд бардоштани сатҳи сифати маводи иттилоотӣ аҳамияти хосса доранд.

Дар маҷмуъ, монографияи Комрон Расулзода саҳми арзанда дар рушди журналистикаи миллӣ гузошта, барои таҳкими заминаҳои илмӣ ва амалии тарғиби сайёҳӣ ва ҳунарҳои мардумӣ дар Ҷумҳурии Тоҷикистон мусоидат менамояд.

АКС: Рӯзномаи «Хатлон»