Муовини Раиси Маҷлиси намояндагон бо Президенти Сенати иёлоти Ютаи Амрико вохӯрӣ намуд

ДУШАНБЕ, 30.04.2026. /АМИТ «Ховар»/.  Имрӯз дар шаҳри Душанбе муовини Раиси Маҷлиси намояндагони Маҷлиси Олии Ҷумҳурии Тоҷикистон Азиз Гиёзода бо Президенти Сенати иёлоти Ютаи Амрико Стюарт Адамс вохӯрӣ намуд. Дар ин хусус ба АМИТ «Ховар» аз Маҷлиси намояндагон хабар доданд.

Муносибатҳои дипломатӣ байни Ҷумҳурии Тоҷикистон ва Иёлоти Муттаҳидаи Амрико 14 феврали соли 1992 барқарор гардида, пайваста рушд меёбанд. То имрӯз 35 санади ҳамкорӣ байни кишварҳои мо дар соҳаҳои гуногун ба имзо расидаанд, ки метавонанд ба рушди муносибатҳои дуҷониба мусоидат намоянд.

Ҳамкории мутақобили судманди байнипарламентии Тоҷикистон ва Иёлоти Муттаҳидаи Амрико дар чорчӯби қолаби С5+1, инчунин Гурӯҳи дӯстӣ ва ҳамкории байнипарламентӣ бо Палатаи намояндагони Иёлоти Муттаҳидаи Амрико муҳим арзёбӣ гардид.

Робитаҳои Тоҷикистон бо Амрико яке аз авлавияти сиёсати хориҷӣ ба шумор рафта, ҳамкории мо дар соҳаҳои гуногун, аз ҷумла сиёсӣ, амниятӣ, иқтисодӣ, энергетика, маориф, тандурустӣ, кишоварзӣ, башардӯстона ва дигар мавзуоти мавриди назар пеш бурда мешаванд.

Азиз Гиёзода аз таваҷҷуҳи Конгресс ва роҳбарияти олии Амрико ба робитаҳои мутақобили судманд бо Тоҷикистон, аз ҷумла Маҷлиси намояндагон, ки солҳои охир афзудааст, изҳори қаноатмандӣ намуд.

«Мо бар он назарем, ки мақоми олии қонунгузор тавассути қабули қонунҳо ва тасдиқи шартномаҳои байналмилалӣ метавонад дар таҳкими ҳамкорӣ ва ташаккули асосҳои ҳуқуқии муносибатҳои дуҷониба саҳм гузорад», -изҳор намуд Азиз Гиёзода.

АКС: Маҷлиси намояндагони Маҷлиси Олии Ҷумҳурии Тоҷикистон