ПАЙВАНДИ ИЛМ БО ИСТЕҲСОЛОТ. Дар Донишгоҳи технологии Тоҷикистон озмуни ихтироъкорӣ ва навоварӣ доир шуд
ДУШАНБЕ, 30.04.2026. АМИТ «Ховар»/. «Ихтироъкори ҷавон» ва «Беҳтарин лоиҳаҳои инноватсионии донишҷӯӣ»- таҳти чунин унвон дар Донишгоҳи технологии Тоҷикистон бахшида ба 35-солагии Истиқлоли давлатии Ҷумҳурии Тоҷикистон озмунҳои дохилидонишгоҳӣ баргузор гардиданд. Дар ин хусус АМИТ «Ховар» бо истинод ба Донишгоҳи технологии Тоҷикистон иттилоъ медиҳад.
Озмунҳо ба «Бистсолаи омӯзиш ва рушди фанҳои табиатшиносӣ, дақиқ ва риёзӣ дар соҳаи илму маориф» ва «Ҳафтаи илм» бахшида шуданд.
Ректори Донишгоҳи технологии Тоҷикистон Зоир Раҳмонзода иброз намуд, ки дар шароити ҷаҳони босуръат тағйирёбанда рушди ихтироъкорӣ ва инноватсия омили асосии пешрафти иқтисоди миллӣ буда, маҳз зеҳн, дониш ва тафаккури эҷодӣ сарвати воқеии миллат маҳсуб мешаванд.
Донишгоҳи технологии Тоҷикистон ҳамчун маркази тавлиди идеяҳои нав муҳити мусоиди рушди стартапҳо ва парвариши ихтироъкорони ҷавонро фароҳам оварда, солҳои охир ба комёбиҳои назаррас, аз ҷумла гирифтани 26 патент ва татбиқи даҳҳо лоиҳаҳои илмӣ муваффақ гардидааст.
Дар доираи ҳамкории байналмилалӣ ва барномаҳои табодули академӣ, аз ҷумла «Erasmus+» донишҷӯён ва омӯзгорон имкони такмили дониш ва таҷрибаомӯзиро дар донишгоҳҳои пешрафтаи Аврупо пайдо намудаанд. Иштироки фаъоли донишҷӯён дар чорабиниҳои байналмилалӣ, аз ҷумла Фестивали «100 навовари ояндаи Созмони ҳамкории Шанхай» бозгӯи рушди неруи зеҳнии ҷавонон арзёбӣ гардид.
Ҳамчунин ба масъалаҳои рушди инфрасохтори илмӣ, дастгирии ташаббусҳои инноватсионӣ, таҳкими ҳамкорӣ бо бахши саноат ва омодасозии мутахассисони рақобатпазир таваҷҷуҳи махсус зоҳир гардид.
Иштирокдорон аҳамияти пайваст намудани илм бо истеҳсолот ва нақши донишгоҳҳоро дар рушди технологияҳои муосир муҳим арзёбӣ намуда, саҳми ҷавононро дар пешбурди соҳаи саноат муассир маънидод карданд. Таъкид шуд, ки баргузории чунин озмунҳо барои дарёфти истеъдодҳои ҷавон, рушди фарҳанги таҳқиқотӣ ва ташаккули тафаккури инноватсионӣ заминаи мусоид фароҳам оварда, яке аз самтҳои афзалиятноки сиёсати давлатӣ маҳсуб мешавад.
АКС: Донишгоҳи технологии Тоҷикистон
Дар солҳои соҳибистиқлолӣ дар шаҳру ноҳияҳои Суғд 986 муассисаи таълимӣ ба истифода дода шуд
Байни Академияи идоракунии давлатии Тоҷикистон ва Донишгоҳи технологии Ланҷоу Ёддошти тафоҳум ба имзо расид
157 довталаб аз шаҳри Душанбе ба даври ниҳоии Озмуни ҷумҳуриявии «Илм – фурӯғи маърифат» роҳхат гирифтанд
ТАШАББУСИ ТОҶИКИСТОН ДАР РУШДИ ЗЕҲНИ СУНЪИИ БЕХАТАР ДАР АРСАИ ҶАҲОНӢ. Мулоҳизаҳо дар ин маврид
Доир ба масоили муҳими соҳаи нақлиёт ва инфрасохтори роҳҳо конференсияи байналмилалӣ баргузор шуд
ФАРДОИ ТОҶИКИСТОН ИМРӮЗ ДАР МАКТАБ АСТ. Андешаҳо дар ҳошияи суханронии Президенти Ҷумҳурии Тоҷикистон дар Рӯзи дониш
Зиёда аз 40 ҳазор нафар ҷавонони Тоҷикистон дар муассисаҳои таҳсилоти олии қариб 50 кишвари ҷаҳон илму дониш ва касбҳои муосир меомӯзанд
Масоили омода намудани мутахассисон дар дохил ва хориҷи Тоҷикистон баррасӣ шуд
350 нафар донишҷӯёни тоҷик дар Ҷумҳурии Корея таҳсил менамоянд
Ёддошти тафоҳум байни Вазорати маориф ва илми Ҷумҳурии Тоҷикистон ва Вазорати маорифи Ҷумҳурии Корея ба имзо расид
Байни Тоҷикистон ва Корея Ёддошти тафоҳуми ҳамкорӣ оид ба барқарорсозии рақамии ҷангалҳо ва амалиёти иқлимӣ ба имзо расид
Барои рушди соҳаи маорифи ноҳияҳои водии Рашт дар 20 соли охир беш аз 2,1 миллиард сомонӣ равона шудааст
