Президенти Тоҷикистон таъмини амнияти озуқавориро масъалаи стратегӣ ва ҳаётан муҳим номиданд

ДУШАНБЕ, 30.04.2026. /АМИТ «Ховар»/. 29 апрел зимни баргузории маҷлиси Ҳукумати Ҷумҳурии Тоҷикистон Раиси Ҳукумати Ҷумҳурии Тоҷикистон, Пешвои миллат муҳтарам Эмомалӣ Раҳмон натиҷаҳои рушди иҷтимоию иқтисодии мамлакатро дар семоҳаи якуми соли 2026 таҳлил намуда, дар назди масъулини сохторҳои давлатӣ вазифаҳои мушаххас гузоштанд.

Аз ҷумла, Сарвари давлат таъмин намудани амнияти озуқавориро барои мамлакат масъалаи стратегӣ ва ҳаётан муҳим номиданд.

Бо назардошти муҳимияти ин масъала сохторҳои марбута ва мақомоти иҷроияи ҳокимияти давлатии вилоятҳо ва шаҳру ноҳияҳо аз Роҳбари давлат муҳтарам Эмомалӣ Раҳмон супориш гирифтанд, ки кишти баҳорӣ ва такрориро сари вақт анҷом дода, истифодаи самараноки замин ва гирифтани се — чор ҳосилро таъмин намоянд, кишти зери плёнка ва обёрии қатрагиро васеъ гузаронанд, барои пешгирии талафоти занбӯри асал, рушди чорводорӣ, зиёд намудани истеҳсоли гӯшт ва дигар маҳсулоти асосии озуқаворӣ, инчунин коҳиш додани вобастагӣ аз воридот тадбирҳои мушаххас андешанд.

Дастурҳо ҳамчунин барои беҳтар намудани ҳолати мелиоративии заминҳо ва истифодаи самараноки захираҳои об дода шуданд.

Дигар сохторҳо уҳдадор шуданд, ки барои таъмини соҳа бо нуриҳои минералии ватанӣ ва коҳиш додани вобастагӣ аз воридот тадбирҳои таъхирнопазир андешанд.

Ба андешаи Пешвои миллат муҳтарам Эмомалӣ Раҳмон, ин амал талаботи замон, вазифаи давлатӣ ва масъулияти  роҳбарони сохторҳои дахлдор ва  кишоварзон мебошад.

АКС: Хадамоти матбуоти Президенти Ҷумҳурии Тоҷикистон