Таҷрибаи Тоҷикистон дар ислоҳоти соҳаи тандурустӣ дар доираи СҲШ муаррифӣ карда шуд

ДУШАНБЕ, 20.04.2026. /АМИТ «Ховар»/. Имрӯз Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода дар ҷаласаи нуҳуми вазирони тандурустии кишварҳои аъзои Созмони ҳамкории Шанхай (СҲШ), ки дар шаҳри Бишкеки Ҷумҳурии Қирғизистон доир шуд, иштирок намуд. Дар ин хусус ба АМИТ «Ховар» аз маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар доданд.

Дар ҷаласа роҳбарият ва намояндагони вазоратҳои тандурустии кишварҳои аъзои СҲШ ва мудири Дафтари минтақавии Созмони ҷаҳонии тандурустӣ барои Аврупо Ҳанс Ҳенрӣ Клюге иштирок намуданд.

Зимни ҷаласа доираи васеи масъалаҳои муҳими рушди соҳаи тандурустӣ, аз ҷумла беҳтар кардани идораи давлатии низоми тандурустӣ, баланд бардоштани устувории низомҳои миллии тандурустӣ, рушди технологияҳои рақамӣ ва ташаббусҳо оид ба густариши ҳамкории бисёрҷониба дар доираи Созмон мавриди баррасӣ қарор гирифтанд.

Иштирокдорон ба табдили рақамии соҳаи тандурустӣ, ҷорӣ намудани системаҳои муосири иттилоотӣ, рушди тибби фосилавӣ ва афзоиши дастрасии хизматрасонии тиббӣ, махсусан барои сокинони минтақаҳои дурдаст таваҷҷуҳи хосса зоҳир намуданд.

Ҷониби Тоҷикистон доир ба татбиқи мунтазами ислоҳоти соҳаи тандурустӣ дар кишвар, ки ба беҳтар намудани сифат ва дастрасии хизматрасонии тиббӣ нигаронида шудааст, маълумот дод. Аз ҷумла густариши инфрасохтори тандурустӣ, навсозии муассисаҳои тиббӣ ва беҳтар кардани нишондиҳандаҳои асосии тандурустии ҷамъиятӣ дар кишвар махсус таъкид карда шуд.

Дар ин замина, коҳиши сатҳи фавти кӯдак ва модар, инчунин коҳиши умумии бемориҳои сироятӣ ва ғайрисироятӣ таъкид гардид.

Дар анҷом протоколи ҷаласаи нуҳуми вазирони тандурустии кишварҳои аъзои Созмони ҳамкории Шанхай ба имзо расид.

АКС: Маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон