Тоҷикистон ва Қазоқистон ҳамкориро дар доираи низоми ягонаи энергетикии Осиёи Марказӣ тақвият медиҳанд

ДУШАНБЕ, 08.04.2026. /АМИТ «Ховар»/. Тоҷикистон ва Қазоқистон ҳамкориро дар доираи низоми ягонаи  энергетикии Осиёи Марказӣ тақвият медиҳанд, хабар медиҳад АМИТ «Ховар» бо истинод ба Вазорати энергетика ва захираҳои оби Ҷумҳурии Тоҷикистон.

Ин ва дигар масъалаҳои марбут ба тавсеаи  ҳамкорӣ дар мулоқоти роҳбарияти вазоратҳои энергетика ва захираҳои оби Тоҷикистон ва Қазоқистон дар шаҳри Остона баррасӣ гардиданд.

Хусусан масъалаҳои марбут ба  татбиқи лоиҳаҳои муштараки соҳавӣ, инчунин мубодилаи таҷриба дар самти истифодаи самаранок ва устувори захираҳои энергетикӣ дар меҳвари мулоқоти  ҷонибҳо қарор гирифтанд.

Таъкид шуд, ки таҳкими ҳамкории мутақобили судманд байни Тоҷикистон ва Қазоқистон метавонад ба баланд бардоштани сатҳи амнияти энергетикӣ дар минтақа, таъмини устувории низомҳои энергетикӣ ва рушди иқтисоди миллии ҳарду давлат мусоидат намояд.

Дар анҷом ҷонибҳо барои идомаи муколамаи созанда ва густариши ҳамкории мутақобили судманд омодагӣ баён намуданд.

АКС: Вазорати энергетика ва захираҳои оби Ҷумҳурии Тоҷикистон