«ТОҶИКИСТОН — ВАТАНИ АЗИЗИ МАН». Дар Донишгоҳи давлатии ҳуқуқ, бизнес ва сиёсати Тоҷикистон даври донишгоҳии озмун доир шуд

ДУШАНБЕ, 17.04.2026. /АМИТ «Ховар»/. Дар Донишгоҳи давлатии ҳуқуқ, бизнес ва сиёсати Тоҷикистон даври донишгоҳии Озмуни ҷумҳуриявии «Тоҷикистон — Ватани азизи ман» доир гардид.

Тавре ба АМИТ «Ховар» аз ин донишгоҳ хабар доданд, дар озмун 15 донишҷӯ–ғолиби даври факултетӣ байни ҳам рақобат намуданд. Ғолибон тибқи баҳогузории ҳакамон муайян гардида, ба даври шаҳрӣ роҳхат гирифтанд.

Ҳар номинатсия дорои талаботи махсуси касбӣ буда, дар вақти иҷро таълифи асари мусиқӣ, шеър, суруд ва оҳанг, санъати тасвирӣ ба инобат гирифта шуд.

Озмун бо мақсади иҷрои Амри Президенти Ҷумҳурии Тоҷикистон аз 2 январи соли 2026 ва дарёфти истеъдодҳои нав дар соҳаи санъати мусиқӣ ва сарояндагӣ, тасвирӣ ва дизайн, баланд бардоштани маҳорати касбӣ ва зебоишиносӣ, тақвият бахшидан ба ҳунари баланди иҷрокунандагӣ, таблиғ ва эҳёи ҳунарҳои мардумӣ, муаррифии фарҳанги волои миллати тоҷик, эҳтиром ва арҷгузорӣ ба суннатҳои неки аҷдодӣ, сатҳи касбии асарҳои нави мусиқӣ, офарандагӣ, интихоби намунаҳои беҳтарини оҳангу суруд, коллексияҳо ва асарҳои рассомӣ, ки инъикоскунандаи фарҳанги гузашта ва имрӯзаи миллати тоҷик мебошанд, аз рӯи номинатсияҳои сарояндагӣ, навозандагӣ, санъати тасвирӣ ва дизайн доир шуд.

Ёдовар мешавем, ки Озмуни ҷумҳуриявии «Тоҷикистон–Ватани азизи ман»  аз рӯйи номинатсияҳои зерин гузаронида мешавад:

— оҳангсозӣ-бастакорӣ;

— сарояндагӣ;

— навозандагӣ;

— санъати тасвирӣ;

— дизайн.

Дар панҷ номинатсия асарҳое пешниҳод мегарданд, ки дар мавзуи зебоии табиати Тоҷикистон, ишқу ҷавонӣ, васфи Ватану ватандӯстӣ, идеяҳои истиқлолу озодӣ, сулҳу субот, ваҳдату якпорчагии Тоҷикистон, тараннуми симоҳои барҷастаи миллат, ҷашнҳои Наврӯз, Меҳргон, Сада, Тиргон, об ҳамчун манбаи ҳаёт, ободӣ, эҳёи ҳунарҳои мардумӣ ва ғайра таълиф шудаанд.

Тибқи Низомномаи озмун, дар номинатсияи санъати тасвирӣ нусхабардории асарҳои рассоми дигар қатъиян манъ аст. Асари офарида бояд бе ёрии падару модар ва устод тартиб дода шуда, дар қисмати қафои он номи асар, насаб, ном ва номи падар, синну соли иштирокдори озмун, номи муассиса, суроғаи ҷойи истиқомат ва роҳбар (омӯзгор) дарҷ мегардад.

АКС: Донишгоҳи давлатии ҳуқуқ, бизнес ва сиёсати Тоҷикистон