«ТОҶИКИСТОНИ МАН!». Дар шаҳри Ҳисор маҳфил-озмун ҷамъбаст гардид

ДУШАНБЕ, 30.04.2026. /АМИТ «Ховар»/. Бо ташаббуси Кумитаи иҷроияи Ҳизби Халқии Демократии Тоҷикистон дар шаҳри Ҳисор ба ифтихори Соли вусъат додани корҳои ободониву созандагӣ ва тақвияту таҳкими худшиносии миллӣ (2026) ва 35-солагии Истиқлоли давлатӣ дар Китобхонаи марказии шаҳри Ҳисор даври шаҳрии маҳфил-озмуни «Тоҷикистони ман!» баргузор гардид. Дар ин хусус ба АМИТ «Ховар» аз Кумитаи иҷроияи Ҳизби Халқии Демократии Тоҷикистон дар шаҳри Ҳисор хабар доданд.

Дар даври якуми маҳфил – озмуни «Тоҷикистони ман!» 1750 нафар иштирок намуда, 254 нафар ба даври шаҳрӣ роҳхат гирифт.

Мақсади гузаронидани маҳфил-озмун аз таҳкими арзишҳои маънавию фарҳангӣ, бедор намудани ҳисси ватандӯстию меҳанпарастӣ, арҷгузорӣ ба забони давлатӣ, эҳтиром ба муқаддасоти миллӣ дар байни ҷавонон ва наврасон, талқини онҳо барои озодона сухан гуфтан бо забони ноби адабии тоҷикӣ ва муаррифии Тоҷикистон ба ҷаҳониён ҳамчун давлати дорои таърихи қадимӣ иборат буд.

Иштирокчиёни озмун тибқи талаботи Низомнома дар назди ҳайати ҳакамон баромад намуданд.

Дар асоси ҷадвал аз ҷониби комиссия ба ҳозирҷавобӣ, маълумоти мухтасар дар бораи асар ва тарзи қироати ғазал аз осори шоирони классики тоҷику форс аз ҷониби иштирокчиён баҳо гузошта шуд.

АКС: Кумитаи иҷроияи Ҳизби Халқии Демократии Тоҷикистон дар шаҳри Ҳисор