Вакили Маҷлиси намояндагон дар ҷаласаи ҳамоҳангсози Ассамблеяи парламентии Осиё иштирок намуд

ДУШАНБЕ, 17.04.2026 /АМИТ «Ховар»/. Дар доираи ҷаласаи 152-юми Иттиҳоди байнипарламентӣ дар шаҳри Истанбули Ҷумҳурии Туркия ҷаласаи ҳамоҳангсози Ассамблеяи парламентии Осиё баргузор гардид, ки дар  он вакили Маҷлиси намояндагони Маҷлиси Олии Ҷумҳурии Тоҷикистон Ғайрат Азиззода иштирок намуд. Дар ин хусус ба АМИТ «Ховар» аз Маҷлиси намояндагон хабар доданд.

Дар ҷаласа  масъалаҳои муҳимми рӯзномаи Ассамблея, аз ҷумла таҳкими ҳамоҳангии байнипарламентӣ, густариши ҳамкорӣ дар минтақаи Осиё ва ташаккули мавқеи ягонаи давлатҳои аъзо дар сатҳи парлумонии байналмилалӣ мавриди баррасӣ қарор гирифт.

Дар ҷаласа аҳаммияти густариши ҳамкории байнипарламентӣ ва нақши калидии Ассамблеяи парламентии Осиё дар таҳкими ҳамгироии минтақавӣ, таҳкими эътимод ва рушди муколамаи созанда байни кишварҳои аъзо таъкид шуд. Ҳамзамон изҳор гардид, ки Ҷумҳурии Тоҷикистон ҷонибдори тақвияти ҳамкории бисёрҷониба ва истифодаи самараноки минбарҳои парлумонӣ барои пешбурди рӯзномаи умумии минтақавӣ мебошад.

Соли 2026 Маҷлиси намояндагони Маҷлиси Олии Ҷумҳурии Тоҷикистон бори аввал раёсати Кумитаи Ассамблеяи парламентии Осиё оид ба масъалаҳои иҷтимоӣ ва фарҳангиро ба уҳда гирифт. Ин иқдом ҳамчун марҳилаи муҳими таҳкими мавқеи Ҷумҳурии Тоҷикистон дар низоми ҳамкории парламентии минтақавӣ ва саҳми фаъолона дар пешбурди ташаббусҳои соҳавӣ арзёбӣ гардид.

Таъкид карда шуд, ки фаъолияти ин кумита ба пешбурди масъалаҳои муҳимми иҷтимоӣ, маориф, фарҳанг ва ҳифзи арзишҳои инсонӣ равона гардида, ба таҳкими сулҳ, субот ва рушди устувор дар минтақа мусоидат менамояд. Дар ин замина ҷонибҳо барои густариши ҳамкории амалии байни кишварҳои аъзо ва табодули таҷрибаи пешқадам ибрози омодагӣ намуданд.

АКС: Маҷлиси намояндагони Маҷлиси Олии Ҷумҳурии Тоҷикистон