35-СОЛАГИИ ИСТИҚЛОЛИ ДАВЛАТӢ. 106,7 фоизи корҳои созандагӣ бахшида ба ҷашни миллии Тоҷикистон таъмин гардидааст

ДУШАНБЕ, 01.05.2026. /АМИТ «Ховар»/. 29 апрел зимни баргузории маҷлиси Ҳукумати Ҷумҳурии Тоҷикистон Раиси Ҳукумати Ҷумҳурии Тоҷикистон, Пешвои миллат муҳтарам Эмомалӣ Раҳмон  иҷрои нақшаи корҳои ободонию созандагиро ба ифтихори ҷашни бузурги миллӣ — 35-солагии Истиқлоли давлатӣ таҳлил намуданд.

Иттилоъ дода шуд, ки то имрӯз 106,7 фоизи корҳои созандагӣ таъмин гардидааст. Ин нишондиҳанда аз саъю талоши созандаи мардуми Тоҷикистон ва фаъолияти самараноки мақомоти давлатӣ шаҳодат медиҳад.

Сарвари давлат муҳтарам Эмомалӣ Раҳмон иброз доштанд, ки бо вуҷуди дастовардҳо дар баъзе шаҳру ноҳияҳо иҷрои нақша ҳанӯз қонеъкунанда нест.

Бо назардошти ин, ба роҳбарони вазорату идораҳо, мақомоти иҷроияи ҳокимияти давлатӣ ва намояндагони мақомоти марказӣ супориши қатъӣ дода шуд, ки барои бартараф намудани қафомонӣ ва иҷрои пурраи нақшаи корҳои ободонию созандагӣ тадбирҳои таъхирнопазир андешанд, ба сифати сохтмон диққати аввалиндараҷа зоҳир намоянд, ҷалби сармояи хусусӣ ва иштироки фаъолонаи аҳолиро дар корҳои созандагӣ боз ҳам тақвият бахшанд.

АКС: Хадамоти матбуоти Президенти Ҷумҳурии Тоҷикистон