35-СОЛАГИИ ИСТИҚЛОЛИ ДАВЛАТӢ. Дар ноҳияи Бобоҷон Ғафуров корхонаҳои саноатӣ ба истифода дода мешаванд

ДУШАНБЕ, 01.05.2026. /АМИТ «Ховар»/. Бахшида ба 35-солагии Истиқлоли давлатӣ дар ноҳияи Бобоҷон Ғафурови вилояти Суғд якчанд корхонаи саноатӣ ба истифода дода мешавад. Дар ин хусус АМИТ «Ховар» бо истинод ба хадамоти матбуоти Раиси вилояти Суғд иттилоъ медиҳад.

Аз ҷумла, бо мақсади таъмини рушди соҳаи саноат корхонаи Ҷамъияти дорои масъулияти маҳдуди «Ирода-инвест» барои коркарди гандум ва истеҳсоли орд барои макарон бунёд мегардад. Ҳоло дар корхона раванди васлу насби дастгоҳу таҷҳизоти истеҳсолӣ идома дорад. Таҷҳизоти зарурӣ ба корхона аз Ҷумҳурии Мардумии Чин ворид гардида, беш аз 70 фоизи корҳои васлу насби он анҷом ёфтаанд.

Дар доираи созандагию бунёдкорӣ чунин корхонаҳо дар самти коркарди гандум ва истеҳсоли орд дар ҷумҳурӣ бори нахуст амалӣ шуда, барои афзоиши истеҳсоли маҳсулоти макаронӣ ва коҳиши воридот заминаи мусоид фароҳам меоранд.  Корхона дар як шабонарӯз то 200 тонна ва дар як сол беш аз 70 ҳазор  тонна гандум коркард мекунад.

Иттилоъ дода шуд, ки бо оғоз гардидани фаъолияти корхона зиёда аз 20 сокини маҳаллӣ бо ҷойи кори доимӣ ва маоши хуб таъмин хоҳанд шуд.

Инчунин дар вилоят корхонаи истеҳсоли орди Ҷамъияти дорои масъулияти маҳдуди «Фатир Агро» бунёд мегардад. Иншооти мазкур аз ҷумлаи корхонаҳои нави саноатӣ дар ноҳияи Бобоҷон Ғафуров буда, бо истифода аз технологияҳои муосир сохта мешавад.

Баъди ба истифода додани корхона дар як шабонарӯз то 1000 тонна гандум коркард карда мешавад. Бо фаъол гардидани корхона 500 нафар бо ҷойи кор ва маоши хуб таъмин карда мешаванд.

АКС: Хадамоти матбуоти Раиси вилояти Суғд