5 май дар баъзе минтақаҳои Тоҷикистон сар задани сел дар назар аст

ДУШАНБЕ, 04.05.2026. /АМИТ «Ховар»/. 5 май дар вилояти Хатлон, минтақаҳои доманакӯҳию кӯҳии вилояти Суғд ва ноҳияҳои тобеи ҷумҳурӣ, ҳамзамон дар баъзе ноҳияҳои ғарбии Вилояти Мухтори Кӯҳистони Бадахшон хавфи сар задани селҳои дорои хусусияти маҳаллӣ боқӣ мемонад. Дар ин хусус  АМИТ «Ховар» бо истинод ба  Агентии обуҳавошиносии мамлакат иттилоъ медиҳад.

Агентӣ ба шаҳрвандон тавсия медиҳад, ки дар чунин вазъи номусоиди обу ҳаво тадбирҳои эҳтиётӣ андешанд. Сокинон бояд вазъи боду ҳаворо ба назар гирифта, амал намоянд.

Инчунин ба аҳолии дар доманакӯҳҳо ва ноҳияҳои кӯҳӣ истиқоматкунанда, сокинон ва меҳмонони мамлакат тавсия дода мешавад, ки дар ин рӯзҳо аз сафар ба минтақаҳои хатарнок, ҷамъоварии ҳезум, хӯроки чорво, гиёҳҳои шифобахш ва моҳидорӣ худдорӣ намоянд. Инчунин сайёҳоне, ки нақшаи сафар бо роҳҳои кӯҳиро доранд, бояд эҳтиёткор бошанд.

Барои пешгирӣ аз ворид шудани оби сел ба хонаҳо, қитъаҳои наздиҳавлигӣ ва заминҳои кишт ҷӯйборҳо, каналҳо ва селроҳаҳо бояд сари вақт аз ҳар гуна хасу хошок ва сангу рег тоза карда шаванд.