Ҳамкории Тоҷикистон ва Бонки Осиёии рушд дар самти ҷалби сармоя ба соҳаҳои афзалиятноки иқтисод баррасӣ шуд

ДУШАНБЕ, 05.05.2026. /АМИТ «Ховар»/. Дар шаҳри Самарқанд мулоқоти Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Султон Раҳимзода бо директори генералии Департаменти Осиёи Марказӣ ва Ғарбии Бонки Осиёии рушд хонум Лиа Гутиеррес баргузор гардид.

АМИТ «Ховар» бо истинод ба Кумитаи давлатии сармоягузорӣ ва идораи амволи давлатии Ҷумҳурии Тоҷикистон иттилоъ медиҳад, зимни мулоқот масоили ҳамоҳангсозии талошҳои муштарак ва имконияти ҷалби захираҳои молиявӣ ва техникии Бонки Осиёии рушд ба иқтисодиёти Тоҷикистон баррасӣ гардид.

Ҷонибҳо вазъи феълӣ ва дурнамои робитаҳои Тоҷикистон бо Бонки Осиёии рушд, идомаи татбиқи ислоҳот ва дигаргунсозии иқтисодӣ, маблағгузории лоиҳаҳои сармоягузории давлатӣ дар соҳаҳои афзалиятнок, масъалаҳои марбут ба тағйирёбии иқлим, рафъи оқибатҳои офатҳои табиӣ, рушди иқтисоди «сабз» ва ҷалби сармоягузориҳо барои сохтмони иншооти муҳими стратегии мамлакатро муҳокима намуданд.

АКС: Кумитаи давлатии сармоягузорӣ ва идораи амволи давлатии Ҷумҳурии Тоҷикистон