Ҳамкории Тоҷикистон ва Словения дар соҳаи иқтисод густариш меёбад

ДУШАНБЕ, 06.05.2026. /АМИТ «Ховар»/.  Вазъи кунунии муносибатҳои тиҷоратию иқтисодии Тоҷикистон ва Словения 5 май зимни вохӯрии муовини Вазири рушди иқтисод ва савдои Ҷумҳурии Тоҷикистон Аҳлиддин Нуриддинзода ва Сафири Фавқулода ва Мухтори Ҷумҳурии Словения дар Ҷумҳурии Тоҷикистон Аленка Сухадолник баррасӣ гардид.

Тавре ба АМИТ «Ховар» аз Вазорати рушди иқтисод ва савдои Ҷумҳурии Тоҷикистон хабар доданд, дар вохӯрӣ ҷонибҳо зарурати диверсификатсияи номгӯйи маҳсулоти содиротӣ ва тавсеаи робитаҳои тиҷоратиро ҳамчун афзалияти ҳамкории минбаъда изҳор доштанд.

Дар вохӯрӣ самтҳои ояндадори ҳамкорӣ, аз ҷумла дорусозӣ, гидроэнергетика, технологияҳои «сабз», коркарди маҳсулоти кишоварзӣ, нассоҷӣ ва технологияҳои иттилоотӣ мавриди баррасӣ қарор гирифтанд.

Бо назардошти таҷрибаи бузурги Словения дар соҳаи дорусозӣ пешниҳод гардид, ки гуфтушунид оид ба ташкили истеҳсоли муштараки доруворӣ дар Тоҷикистон оғоз карда шавад.

Дар анҷоми вохурӣ тарафҳо барои фаъолсозии ҳамкорӣ дар тамоми самтҳои манфиатноки мутақобил ибрози омодагӣ намуданд.

АКС: Вазорати рушди иқтисод ва савдои Ҷумҳурии Тоҷикистон