Бахшида ба Рӯзи ҷаҳонии футбол дар Донишгоҳи давлатии ҳуқуқ, бизнес ва сиёсати Тоҷикистон мусобиқаи футбол доир гардид

ДУШАНБЕ, 15.05.2026 /АМИТ «Ховар»/. Дар Донишгоҳи давлатии ҳуқуқ, бизнес ва сиёсати Тоҷикистон маросими ҷамъбасти мусобиқаи футбол байни донишҷӯёни факултетҳо баргузор гардид.

Тавре ба АМИТ «Ховар» аз ин донишгоҳ хабар доданд, мусобиқа ба 35-солагии Истиқлолияти давлатии Ҷумҳурии Тоҷикистон, Рӯзи ҷаҳонии футбол (25 май) ва Рӯзи ҷавонони Тоҷикистон (23 май) бахшида шуда, аз 20 апрел то 14 май гузаронида шуд.

Иброз  гардид, ки сиёсати давлатии ҷавонон ва варзиш таҳти роҳбарии Президенти Ҷумҳурии Тоҷикистон муҳтарам Эмомалӣ Раҳмон яке аз самтҳои афзалиятноки сиёсати иҷтимоии давлат ба ҳисоб меравад. Ҷавонон ҳамчун неруи созанда ва пешбарандаи ҷомеа дар рушди давлату миллат нақши калидӣ дошта, тавассути ҷалби онҳо ба варзиш ва тарзи ҳаёти солим метавон насли солиму ватандӯст ва соҳибмаърифатро тарбия намуд.

Имрӯз варзиш, бахусус футбол дар Тоҷикистон бо дастгирии Президенти Федератсияи футболи Тоҷикистон муҳтарам Рустами Эмомалӣ рушду тавсеаи бесобиқа ёфта, барои ҷавонон тамоми шароити мусоид фароҳам оварда шудааст.
Баргузории мусобиқаи футбол дар байни донишҷӯён на танҳо рақобати варзишӣ, балки саҳнаи дӯстию ҳамдигарфаҳмӣ, таҳкими эҳтироми байниҳамдигарӣ ва рушди руҳияи дастҷамъона ба шумор меравад.

Баргузории чунин мусобиқаҳо барои таҳкими саломатии ҷавонон, пешгирии омилҳои номатлуб ва дарёфти истеъдодҳои нав дар соҳаи футбол аҳамияти муҳим дорад.

Дар ҷараёни бозӣ иштирокчиён маҳорати хуби варзишӣ, интизоми намунавӣ ва ҳисси баланди масъулиятшиносӣ нишон доданд. Дар фарҷом ба ғолибон ва иштирокчиёни фаъоли мусобиқа медал, Диплом, ҷом ва туҳфаҳои хотиравӣ тақдим карда шуданд.

АКС: Донишгоҳи давлатии ҳуқуқ, бизнес ва сиёсати Тоҷикистон