Беш аз 21 ҳазор ҷавонон дар баланд бардоштани маърифати санитарии аҳолии Тоҷикистон саҳм мегузоранд

ДУШАНБЕ, 19.05.2026 /АМИТ «Ховар»/. Дар айни замон дар 51 шаҳру ноҳияи ҷумҳурӣ 1117 дастаи ҷомеавии саломатӣ бо иштироки зиёда аз 21 ҳазору 120 нафар ҷавонон фаъолият дошта, дар самти ҳифзи саломатӣ ва баланд бардоштани маърифати санитарии аҳолӣ саҳми назаррас мегузоранд. Ин матлаб зимни ҳамоиши волонтёрон бахшида ба Рӯзи ҷавонони Тоҷикистон таҳти унвони «Волонтёрӣ — роҳи накую хизмат ба ҷомеа» дар шаҳри Душанбе баён карда шуд.

Тавре ба АМИТ «Ховар» аз маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар доданд, ҳамоиш дар асоси қарори дахлдори Раиси шаҳри Душанбе оид ба таҷлили Рӯзи ҷавонони Тоҷикистон дар шаҳри Душанбе доир гардид.

Дар ҳамоиш иброз шуд, ки волонтёрӣ на танҳо фаъолияти ихтиёрӣ, балки мактаби инсондӯстӣ, ватандӯстӣ, масъулиятшиносӣ ва хизмат ба ҷомеа мебошад. Имрӯз ҷавонон ҳамчун қувваи пешбарандаи ҷомеа дар таҳкими саломатии аҳолӣ, пешгирии бемориҳо, тарғиби тарзи ҳаёти солим ва баланд бардоштани маърифати тиббию санитарии шаҳрвандон саҳми арзишманд мегузоранд.

Ҳамчунин иттилоъ дода шуд, ки барои амалисозии «Барномаи миллии ташаккули тарзи ҳаёти солим дар Ҷумҳурии Тоҷикистон барои солҳои 2022–2026» аз ҷониби Муассисаи давлатии «Маркази ҷумҳуриявии ташаккули тарзи ҳаёти солим» зиёда аз 25 ҳазору 20 нафар волонтёрон омӯзонида шуда, ба корҳои тарғиботию маърифатӣ ҷалб гардидаанд.

Таъкид карда шуд, ки волонтёрон имрӯз дар ташаббусҳо ва чорабиниҳои оммавӣ, аз ҷумла «Тамоку — душмани саломатӣ», «Мо- зидди нашъамандӣ» ва «Ҷавонон-ҷонибдори тарзи ҳаёти солим» фаъолона иштирок менамоянд.

Ёдовар мешавем, ки 23 майи соли 1997 Президенти Ҷумҳурии Тоҷикистон муҳтарам Эмомалӣ Раҳмон бо намояндагони ҷавони Тоҷикистон мулоқот намуда, фармон «Оид ба баъзе масъалаҳои беҳтар кардани кор бо ҷавонон»-ро ба имзо расониданд. Маҳз ҳамин рӯзи таърихӣ сабаб шуд, ки 23 май Рӯзи ҷавонон эълон гардад.

АКС: Маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон