Дабири кулли САҲА саҳми Тоҷикистонро дар таҳкими сулҳу субот дар минтақа баланд арзёбӣ намуд

ДУШАНБЕ, 20.05.2026 /АМИТ «Ховар»/. Имрӯз дар Душанбе мулоқоти Вазири корҳои хориҷии Ҷумҳурии Тоҷикистон Сироҷиддин Муҳриддин бо Дабири кулли Созмони амният ва ҳамкорӣ дар Аврупо Фаридун Синирлиоғлу баргузор гардид.

Тавре ба АМИТ «Ховар» аз Вазорати корҳои хориҷӣ хабар доданд, зимни музокирот ҷонибҳо вазъи кунунӣ ва дурнамои ҳамкории Тоҷикистон бо САҲА, инчунин масъалаҳои амнияти минтақавӣ, таҳкими марзҳо, муқовимат ба таҳдидҳои муосир ва рушди ҳамкории байниминтақавиро баррасӣ намуданд.

Таваҷҷуҳи махсус ба барномаҳои муштарак дар самтҳои таъмини субот, мубориза бо ҷинояткории фаромиллӣ, амнияти киберӣ ва дастгирии рушди иҷтимоиву иқтисодӣ зоҳир гардид.

Вазири корҳои хориҷӣ аҳаммияти ҳамкории амалиро бо САҲА таъкид намуда, ба густариши минбаъдаи он дар самтҳои афзалиятноки мавриди таваҷҷуҳи муштарак таваҷҷуҳ зоҳир кард.

Дабири кулли САҲА саҳми Тоҷикистонро дар таҳкими сулҳу субот дар минтақа баланд арзёбӣ намуда, омодагии созмонро ба хотири  идомаи муколамаи созанда ва татбиқи ташаббусҳои муштарак таъйид кард.

Аз рӯйи натиҷаҳои мулоқот ҷонибҳо пойбандии худро ба рушди шарикӣ ва ҳифзи тамосҳои мунтазам дар сатҳҳои гуногун таъкид намуданд.

АКС: Вазорати корҳои хориҷии Ҷумҳурии Тоҷикистон