Дар Ашқобод нишасти матбуотӣ оид ба омодагӣ ба Конфронси байналмилалии об баргузор гардид

ДУШАНБЕ, 02.05.2026 /АМИТ «Ховар»/. Дар Ашқобод нишасти матбуотӣ оид ба омодагӣ барои баргузории Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор», 2018–2028, ки аз 25 то 28 май дар Душанбе баргузор мешавад, доир гардид.

Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, дар чорабинӣ роҳбарон ва намояндагони корпуси дипломатӣ, созмонҳои байналмилалӣ ва намояндагони воситаҳои ахбори омма иштирок карданд.

Сафири Фавқулода ва Мухтори Тоҷикистон дар Туркманистон Вафо Ниятбекзода нақши Президенти Ҷумҳурии Тоҷикистон, Пешвои миллат муҳтарам Эмомалӣ Раҳмонро дар пешбурди дипломатияи обӣ таъкид намуда, дар бораи ташаббусҳои ҷаҳонии Тоҷикистон дар соҳаи обу иқлим ва Раванди оби Душанбе маълумот пешниҳод кард.

Дар хотима ҳама иштирокчиёни чорабинӣ ва намояндагони воситаҳои ахбори омма барои иштирок дар Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор», солҳои 2018-2028 даъват гардиданд.

АКС: Вазорати корҳои хориҷии Ҷумҳурии Тоҷикистон